ގަވާއިދާ ހިލާފަށް ދުއްވާ އެއްގަމު އުޅަނދުތަކުގައި ސްޓިކާ ޖަހަން ފަށަން ނިންމާފައިވާ ކަމަށް ފުލުހުން ބުނެފިއެވެ.
ފުލުހުން މިރޭ ނެރުނު ބަޔާނެއްގައި ވަނީ އަންނަ ބުރާސްފަތި ދުވަހުން ފެށިގެން ގަވާއިދާ ހިލާފަށް ޕާކްކުރާ އުޅަނދުތަކުގައި ސްޓިކާ ޖަހަން ފަށާނެ ކަމަށެވެ.
ޕާކް ކުރާނެ ޖާގަ ނުދައްކައި ސްޓިކާ ނުޖަހާނެ ކަމުގެ ޔަގީންކަން ރިޔާސީ އިންތިހާބުގެ ކެމްޕޭންގެ ތެރޭގައި ރައީސް ޑރ. މުހައްމަދު މުއިއްޒު ވަނީ ދެއްވާފަ އެވެ.
ފުލުހުންގެ ބަޔާނުގައި ވަނީ ހިނގާބިނގާވެ އުޅޭ މީހުންނާއި މަގުމަތީގައި އުޅަނދު ދުއްވާ މީހުން ހާއްސަކޮށް ބަހާއި އިމަޖެންސީގައި ދުއްވާ އުޅަނދުތަކަށް ދަތިވާގޮތަށް ގަވާއިދާ ހިލާފަށް އުޅަނދު ޕާކްކުރަމުންދާ ކަމަށެވެ.
އެއްގަމު ދަތުރުފަތުރުގެ ގާނޫނުގެ ހަތް ވަނަ މާއްދާ އަދި އެއްގަމު އުޅަނދު ޕާކުކުރުމުގެ ގަވާއިދުގެ 14ވަނަ މާއްދާގައި ބުނެފައި ވަނީ ގަވާއިދާ ހިލާފަށް ޕާކުކޮށްފައިވާ އުޅަނދެއްގައި، ޕާކިން ވަޔަލޭޝަން ސްޓިކާ ޖެހުމުގެ އިހްތިޔާރު މިނިސްޓްރީއަށް ނުވަތަ މިނިސްޓްރީން ކަނޑައަޅާ ފަރާތަކަށް ލިބިގެންވާ ކަމަށެވެ.
ޕާކިން ވަޔަލޭޝަން ސްޓިކާ ޖަހާ ކޮންމެ ފަހަރަކު، އުޅަނދުގެ ވެރިފަރާތް 250ރ. އިން ޖޫރިމަނާ ކުރާނެ އެެވެ. އަދި ގަވާއިދާ ހިލާފަށް ޕާކުކުރުމުގެ ސަބަބުން އުޅަނދެއްގައި ޕާކިން ވަޔަލޭޝަން ސްޓިކާ ޖަހާ ހާލަތްތައް ފިޔަވައި، ގަވައިދާ ހިލާފުވާ ފަރާތްތައް 750ރ. އިން ޖޫރިމަނާ ކުރާނެއެވެ.
ފުލުހުން ބުނީ ގަވައިދާ ހިލާފަށް މައިގަނޑު ފަސް ސަރަހައްދެއްގައި ޕާކްކުރޭތޯ ހާއްސަ ސަމާލުކަމެއް ދީގެން ބަލަމުންދާނެ ކަމަށް ފުލުހުން ބުންޏެވެ.
އެތަންނަކީ:
– ގްރީން ޒޯން
– ޕަބްލިކް ޓްރާންސްޕޯޓު ދުއްވާ މަގުތައް
– މަގުތަކާއި ގޯޅިތަކުގެ ކަންމަތި
– ސްކޫލުތައް ހިމެނޭ ސަރަހައްދު
– އޮފީސް އިމާރާތްތަކާއި ހޮސްޕިޓަލްތަކާއި ނުކުޅެދުންތެރިކަން ހުންނަ މީހުންނަށް ހާއްސަކޮށްފައިވާ ތަންތަނާއި މިސްކިތްތަކާއި އާއްމު ގޭބިސީތަކާއި ގަރާޖުތަކަށް ވަދެނުކުމެ ހަދާ މީހުންނަށް ދަތިވާ ގޮތަށް ޕާކްކުރާ އުޅަނދުފަހަރު
ގުޅުންހުރި
ދިވެހިންގެރާއްޖެ ހޯދަން ރައީސް މުއިއްޒު 15 އަހަރު ވެރިކަމުގައި ބަހައްޓަންޖެހޭ: އަބްދުއްރަހީމް
ކޮރެއާގެ ކުންފުންޏަކަށް 1 މަސް ތެރޭ 3 މިލިއަން ޑޮލަރު ދައްކަން
އުމުރުން ދުވަސްވީ މީހުންގެ އަތުން ފޭރުމުގެ މައްސަލަތައް އިތުރުވަނީ
ރަށެއްގެ ބަނދަރަށް ވަންނަން ވާދަޖެހި ކަމަށް ބުނާ ލޯންޗުތަކުގެ މައްސަލަ ބަލަނީ
ޖެންޒީންނަށް ވިސްނޭނެ ގޮތަކަށް އިސްލާމް ދީނުގެ ކަންކަން ކިޔައިދޭންޖެހޭ: ރައީސް
ފިހާރައެއްގެ ތެރޭގައި ހުރި މީހަކަށް ތޫނު އެއްޗަކުން ހަމަލާދީފި