ފަރެސްމާތޮޑާ ދާއިރާގެ އެމްޑީޕީ ކެންޑިޑޭޓްގެ ގަޔަށް ކަޅުތެޔޮ ޖަހައިފި

ފަރެސްމާތޮޑާ ދާއިރާގެ އެމްޑީޕީ ކެންޑިޑޭޓް އަހްމަދު ޒައީމްގެ ގަޔަށް ކަޅުތެޔޮ ޖަހައިފިއެވެ.

ޒައީމްގެ ގަޔަށް ކަޅުތެޔޮ ޖަހާފައި ވަނީ މިއަދު ހަވީރު އޭނާ ޓީވީ މޯލްޑިވްސްއަށް ވަޑައިގަންނަވަނިކޮށެވެ. އޭނާ ޓީވީ މޯލްޑިވްސްއަށް ވަޑައިގަތީ މަޖިލިސް އިންތިހާބުގައި ވާދަކުރައްވާ ކެންޑިޑޭޓުންގެ ބަހުސްއަށެވެ.

އަމީނީމަގުގައި ހުންނަ ގައުމީ ޔުނިވާސިޓީގެ ފެކަލްޓީ އޮފް އެޑިއުކޭޝަން ކައިރީ ޒައީމް މަޑުކޮށްލައްއިގެން ހުންނަވާ ފޮޓޯތަކެއް މީސް މީޑިއާގައި ވަނީ އާންމުވެފައެވެ. ފޮޓޯތަކުން ފެންނަ ގޮތުގައި އޭނާ ލައިގެންހުރި ހުދުކުލައިގެ ގަމީހަށް ވަނީ ވަރަށް ގިނައިން ގަޅުތެޔޮ ޖަހާފައެވެ.

މިކަމާ ގުޅިގެން އެކްސްގައި ކުރި ޕޯސްޓެއްގައި އެމްޑީޕީން ބުނީ ބަޔަކު ހިންގި އެ ފިނޑި އަމަލު ކުށްވެރިކުރާ ކަމަށެވެ.

ކަޅުތެޔޮ ޖެހުމުން ޒައީމް ވަނީ ގަމީސް ބަދަލުކުރައްވައިގެން ބަހުސްގައި މިއަދު ބައިވެރިވެވަޑައިގެންފައެވެ.