ދުވާފަރު ދާއިރާގެ މެންބަރު އިސްމާއިލްގެ މައްޗަށް 8 ލައްކަ ރުފިޔާގެ ދަރަންޏެއް ދައްކަން ހުކުމްކޮށްފި

މި ދައުވާއަށް ޖަވާބުދާރީވާން އިސްމާއިލަށް ދިން 14 ދުވަހުގެ މުއްދަތު ހަމަވިއިރު ވެސް، ދައުވާއަށް ޖަވާބުދާރީވެފައި ނުވާތީ، މިދިޔަ މަހުގެ 29ގައި އޭނާގެ މައްޗަށް އެ ދަރަނި ސާބިތުވާ ކަމަށް ސިވިލް ކޯޓުން ނިންމީ އޭނާގެ ގައިރު ހާޒިރުގަ އެވެ.

ސިވިލް ކޯޓުން އިއްވި ހުކުމުގައި ބުނެފައިވަނީ އިސްމާއިލް އާއި ހަލީލާ ދެމެދު ވެފައިވާ އެއްބަސްވުމާ އެއްގޮތަށް މަސައްކަތަށްވާ ފައިސާ ދައްކާފައިނުވާކަން މަދަނީ މިންގަނޑުން ޝަރީއަތަށް ސާބިތުވެއްޖެ ކަމަށް ކަނޑައަޅާ ކަމަށެވެ. އެހެންވެ މޫސާ ހަލީލަށް ދޭންޖެހޭ 856،830ރ. 15 ދުވަހުގެ ތެރޭ ސިވިލް ކޯޓަށް ދައްކާ ހަލާސްކުރުމަށް ހުކުމް ކުރި އެވެ.

ގާނޫނުއަސާސީގެ 73 ވަނަ މާއްދާގައިވާ ގޮތުން އަދާކުރާންޖެހޭ ސާބިތު ދަރަންޏެއް އޮތް މީހަކު ނަމަ، ހުކުމާ އެއްގޮތަށް އެ ދަރަނި އަދާކުރަމުން ނުދާ ނަމަ، މެންބަރު ކަމުގެ ޝަރުތު ހަމައެއް ނުވާނެ އެވެ.

އެހެންކަމުން، 15 ދުވަސް ތެރޭގައި މެންބަރު އިސްމާއިލް މި ދަރަނި އަދާ ނުކޮށްފި ނަމަ، އޭނާގެ ގޮނޑިއާ މެދު ސުވާލު އުފެދޭނެ އެވެ. އޭނާ މިހާރު ވެސް ގެންދަނީ އަންނަ މަޖިލީހަށް ދުވާފަރު ދާއިރާ އިން އެމްޑީޕީގެ ކެންޑިޑޭޓެއްގެ ގޮތުގައި ވާދަކުރަމުންނެވެ.