ޑައިވިން ދޯންޏެއްގައި މަހަށް ދިޔަ ދެ މީހަކު ވީނުވީ ނޭނގި ގެއްލުމުން ހޯދަން ފަށައިފި

ޑައިވިން ދޯންޏެއްގައި މަހަށް ދިޔަ ދެ މީހަކު ވީނުވީ ނޭނގި ގެއްލިފައިވާތީ އެ މީހުން ހޯދުމުގެ މަސައްކަތް ފަށައިފިއެވެ.

ފުލުހުން އެކްސްގައި މިރޭ ކުރި ޓުވީޓެއްގައި ބުނީ މިރޭ 22:06 އެހާކަންހާއިރު  މ. މަޑުއްވަރި ކައިރިން ދޯންޏެއްގައި މަހަށް ދިޔަ ދެ މީހަކު ހަބަރެއްނުވެ ވީނުވީއެއް ނޭނގި ގެއްލިފައިވާކަމުގެ ރިޕޯޓު ލިބުނު ކަމަށެވެ. އެކަމުގެ ރިޕޯޓު ލިބުމާއެކު މ. އަތޮޅުގެ ފުލުހުންގެ ލޯންޗެއް އެ މީހުން ހޯދުމުގެ މަސައްކަތް ފަށައިފައިވާ ކަމަށް ފުލުހުން ބުންޏެވެ.

އެ މީހުން ހޯދުމުގައި މަސައްކަތުގައި އެމްއެންޑީއެފުގެ ކޯސްޓު ގާޑު ވެސް ހަރަކާތްތެރި ވަމުންދާ ކަމަށް ފުލުހުން ބުންޏެވެ. އެ ދެ މީހުންނާއި އަދި އެ ދެ މީހުން މަހަށް ދިޔަ ލޯންޗާ ބެހޭ އެއްވެސް މައުލޫމާތެއް ލިބިފައިވާނަމަ 119 ގުޅައި ހިއްސާ ކުރުމަށް ނުވަތަ ކޯސްޓް ގާޑަށް އެ މައުލޫމާތު ދިނުމަށް ފުލުހުން އެދިފައިވެއެވެ.