ނަތަންޔާހޫ ހައްޔަރުކުރުމުގެ އަމުރަކަށް އެދުމުން ރައީސް މަރުހަބާ ވިދާޅުވެއްޖެ

އެކަމާ ގުޅޭ ގޮތުން ރައީސް މިރޭ އެކްސްގައި ކުރެއްވި ޕޯސްޓެއްގައި ވިދާޅުވީ ނަތަންޔާހޫ އާއި ޔޯވް ގަލަންޓްގެ ހައްޔަރު ކުރުމުގެ އަމުރެއް ހޯދުމަށް ހުށަހެޅުމަކީ ފަލަސްތީނުގެ ރައްޔިތުންނަށް އިންސާފު ހޯދައި ދިނުމަށް އެޅުނު މުހިންމު ފިޔަވަޅެއް ކަމަށެވެ. އަދި ބައިނަލްއަގުވާމީ ގާނޫނަށް ވުރެ އެއްވެސް ގައުމެއް މައްޗެއް ނުވާނެ ކަމަށާއި ހިފާފައިވާ ފަލަސްތީނުގައި ހިނގުރާމައިގެ ޖަރީމާތައް ހިންގާ ފަރާތްތަކުން ޖަވާބުދާރީ ކުރަން ޖެހޭނެ ކަމަށްވެސް ވިދާޅުވި އެވެ.

ރައީސް ވިދާޅުވީ، ރޯމް ސްޓެޓޫޓްގައި ބައިވެރިވާ ގައުމެއްގެ ހައިސިއްޔަތުން އިސްރާއީލުން ގާޒާގައި ހަނގުރާމައިގެ ޖަރީމާތަކާއި ލާއިންސާނީ އަމަލު ހިންގިކަން ސާބިތުވާ ވަރަށް އައިސީސީގެ ޕްރޮސެކިއުޓާ އޮފީހުން ހެކި އެއްކޮށްފައިވާ ކަމުގެ ޔަގީންކަން އެބަ އޮތް ކަމަށެވެ.

ނަތަންޔާހޫ އާއި ގަލަންޓް އަދި ހަމާސްގެ ލީޑަރުން ހައްޔަރުކުރުމުގެ އަމުރަކަށް ހުށަހެޅުމުން، އެ ހުށަހެޅުމާމެދު އައިސީސީގެ ފަނޑިޔާރުން ގޮތެއް ނިންމަވާނީ އަމުރު ނެރުމަށް ހުށަހަޅާފައިވާ ހެކިތަކަށް ބެލުމަށްފަހު އެވެ. އެކަމަށް ހަފުތާތަކެއް ނުވަތަ މަސްތަކެއްވެސް ނަގާފާނެ އެވެ.