ކަސްޓްމަސްގެ ވެރިޔާގެ މަގާމަށް ފުރަތަމަ ފަހަރަށް އަންހެން ބޭފުޅެއް

ކޮމިޝަނަރު ޖެނެރަލް އޮފް ކަސްޓަމްސްގެ މަގާމަށް ފުރަތަމަ ފަހަރަށް އަންހެން ބޭފުޅަކު މިއަދު އައްޔަން ކުރައްވައިފި އެވެ.

ރައީސް އޮފީހުގައި މިއަދު މެންދުފުރަހު ބޭއްވި ރަސްމިއްޔާތެއްގައި އެ މަގާމަށް ރައީސް ޑރ. މުހައްމަދު މުއިއްޒު އައްޔަން ކުރައްވާފައިވަނީ ޅ. ހިންނަވަރު/ ސަންދުރަ، ފާތިމަތު ދިޔާނާ އެވެ.

ރައީސް އޮފީހުން ބުނީ، ދިޔާނާ އެ މަގާމަށް އައްޔަން ކުރައްވާފައިވަނީ ސްޓޭޓް މިނިސްޓަރު ފެންވަރުގައި ކަމަށެވެ.

ދިޔާނާ އެ މަގާމަށް އައްޔަން ކުރެއްވުމުގެ ކުރިން ހުންނެވީ ޑެޕިއުޓީ ކޮމިޝަނަރު އޮފް ކަސްޓަމްސްގެ މަގާމުގަ އެވެ. އޭނާއަކީ އެ މަގާމަށްވެސް އަންޔަން ކުރެއްވި ފުރަތަމަ އަންހެން ބޭފުޅެވެ.

ދިޔާނާ ކަސްޓަމްސްގައި ހިދުމަތް ކުރައްވާތާ 23 އަހަރުވެފައިވާއިރު، އޭނާ ޑެޕިއުޓީ ކޮމިޝަނަރު ޖެނެރަލް އޮފް ކަސްޓަމްސްގެ މަގާމަށް އައްޔަން ކުރެއްވުމުގެ ކުރިން ހުންނެވީ އެ މުއައްސަސާގެ ޑެޕިއުޓީ ޗީފް ސުޕްރިންޓެންޑެންޓްގެ މަގާމުގަ އެވެ.