ޕީޖީގެ މަގާމުން ޝަމީމު އިސްތިއުފާ ދެއްވައިފި

ޕްރޮސިކިއުޓާ ޖެނެރަލް (ޕީޖީ) ހުސެއިން ޝަމީމް މަގާމުން އިސްތިއުފާ ދެއްވައިފިއެވެ.

ޕީޖީގެ މަގާމުން ޝަމީމް އިސްތިއުފާ ދެއްވާފައިިމިވަނީ އޭނާ މަގާމުން ވަކިކުރަން ނިންމައި މިރޭ މަޖިލީހުގެ ޖަލްސާއެއް ބާއްވައި ވޯޓަށް އަހަން ނިންމާފައިވަނިކޮށެވެ. މަޖިލީހުގެ އެ ޖަލްސާ ބޭއްވުމަށް ތާވަލުކުރީ މިރޭ 9:00 އަށެވެ. ޝަމީމު އިސްތިއުފާ ދެއްވީ ޖަލްސާ ފެށެން ވަރަށް ކައިރިވެފައިވަނިކޮށެވެ.

މަޖިލީހުގެ ޖުޑީޝަރީ ކޮމިޓީން މިއަދު ބޭއްވި ބައްދަލުވުމުގައި އެގޮތަށް ފާސްކުރުމުގެ ކުރީން ޝަމީމަށް ޖަވާބުދާރީ ވުމުގެ ފުރުސަތު ދިނެވެ. އެ ބައްދަލުވުން ލައިވް ކުރަން ޝަމީމު އެދުނު ނަމަވެސް ކޮމިޓީން ނިންމީ ބައްދަލުވުން ސިއްރުކުރުމަށެވެ.

ޝަމީމު، މިރޭ ޕީޖީގެ މަގާމުން އިސްތިއުފާ ދެއްވިކަން ޕީޖީ އޮފީހުން ވަނީ މީޑިއާތަކަށް ކަށަވަރުކޮށްދީފަ އެވެ.

”ޕްރޮސިކިއުޓަރ ޖެނެރަލްގެ ގާނޫނުގެ 10 ވަނަ މާއްދާގެ (ހ) ގައި ބަޔާންކޮށްފައިވާ ގޮތުގެ މަތިން، ޕްރޮސިކިއުޓާ ޖެނެރަލް އަލްއުސްތާޒް ހުސެއިން ޝަމީމު މަގާމުން އިސްތިއުފާ ދެއްވާފައިވާކަން މި އޮފީހަށް އަންގަވާފައިވެއެވެ،،“ ޕީޖީ އޮފީހުން ބުންޏެވެ.

ޕީޖީގެ މަގާމުގެ މަސްއޫލިއްޔަތުތައް މިހާރު ވަނީ ޑެޕިއުޓީ ޕްރޮސިކިއުޓާ ޖެނެރަލް މަހުމޫދް ސަލީމްއާ ހަވާލުކޮށްފައި ކަމަށް ޕީޖީ އޮފީހުން ބުންޏެވެ.

ޕީޖީގެ މަގާމުން ޝަމީމު ވަކިކުރަން ހުޅުދޫ ދާއިރާގެ ޕީއެންސީ މެންބަރު، މުހައްމަދު ޝާހިދު (ޝާޑް) މަޖިލީހަށް ހުށަހެޅި މައްސަލައިގައި ޝަމީމަށް މަގާމުގެ މަސްއޫލިއްޔަތު އަދާނުކުރެވޭ ކަމަށް ބުނެ ބޮޑެތި ގިނަ ތުހުމަތުތަކެއް ކޮށްފައިވެ އެވެ.

އޭގެ ތެރޭގައި ހިމެނެނީ:

ކުރީގެ ޓޫރިޒަމް މިނިސްޓަރު އަލީ ވަހީދުގެ މައްޗަށް އުފުލި ޖިންސީ ގޯނާ ކުރުމުގެ ދައުވާ އަނބުރާ ގެންނަން ނިންމައި ފައިލް ކުރުން
ކުރީގެ ޔޫތް މިނިސްޓަރު އަހުމަދު މަހުލޫފުގެ މައްޗަށް ކުރެވުނު ކޮރަޕްޝަންގެ ދައުވާ އަނބުރާ ގެންނަން ނިންމި ނިންމުން
މިލަންދޫ ދާއިރާގެ ކުރީގެ މެންބަރު އަލީ ރިޒާގެ މައްޗަށް އުފުލި ހިއުމަން ޓްރެފިކިން ދައުވާ އަނބުރާ ގެންނަން ނިންމި ނިންމުން
އެއްޖިންސުން ގުޅުން ހިންގުމުގެ ބައެއް ދައުވާތައް އަނބުރާ ގެންދަން ނިންމި ނިންމުން
ވެންޓިލޭޓަރު މައްސަލައިގައި ދައުވާ ނުކުރުން ނިންމި ނިންމުން
ޕީޖީ އޮފީހުގެ މުވައްޒަފުންގެ މެދުގައި ތަފާތުކުރުން ގެންގުޅޭ ކަމަށް ބުނާ ބުނުން
ޕީޖީގެ މަގާމުން ޝަމީމު ވަކިކުރަން މިއަދު ބޭއްވި ޖުޑީޝަރީ ކޮމިޓީން ނިންމީ އަށް މެންބަރުން ވޯޓު ދެއްވައިގެންނެވެ. އޭނާ މަގާމުން ވަކިކުރަން ނުފެންނަ ކަމަށް ދެ މެންބަރުން ވޯޓު ދެއްވި އެވެ.

މަގާމުން ވަކިކުރަން ނިންމުމާއި ގުޅިގެން ޕީޖީ އޮފީހުގައި މިއަދު ބޭއްވި ޕްރެސް ކޮންފަރެންސެއްގައި ޝަމީމު ވިދާޅުވީ, މަގާމުން ވަކިކުރަން ނިންމީ މަސައްކަތް ނުކޮށްގެން ނޫން ކަމަށާއި ކަމެއް ސާފުނުވެގެންވެސް ނޫން ކަމަށެވެ. މިކަމަކީ ރާއްޖޭގައި މުޅިން އެހެން ގޮތަކަށް ހިނގާ ކަމެއް ކަމަށްވެސް ވިދާޅުވި އެވެ.

މިއީ އިތުބާރު ނެތިގެން އުޅޭ ކަމެއް ނޫންކަން, މިއީ މުޅިން އެހެން ގޮތަކަށް ހިނގާ ކަމެއްކަން އަޅުގަނޑު އެކަން ދަންނަން. އެކަން ނޭނގިއެއް ނޫން މި އުޅެނީކީ. މިކަން (ވަކީލުކަން ކުރާތާ) ވިއްސަކަށް އަހަރުވެއްޖެ. އަޅުގަނޑު ޑެޕިއުޓީއަކަށް ހުރި އިރުގައި, ކުރީގެ ޕީޖީއަކު އިސްތިއުފާ ދެއްވި. އަޅުގަނޑަށް އިނގޭ މި ހުރިހާ ކަމެއް ހިނގާ ގޮތާއި އަޅުގަނޑު ވަރަށް ފަރިތަ ކަމެއް. މި އޮފީހުގައި މިއުޅެނީކީ އަލަކަށްވެސް ނޫން,“ ޝަމީމު ވިދާޅުވި އެވެ