މެލޭޝިއާ އިން ރާއްޖެ އައި ދިވެއްސަކު ބައި ކިލޯގެ ޑުރަގާއެކު ހައްޔަރުކޮށްފި

ފުލުހުން މީޑިއާތަކަށް ފޮނުވި މެސެޖެއްގައި ބުނީ، އެ މައްސަލައިގައި މި މަހުގެ 16 ވަނަ ދުވަހު ވެލާނާ އިންޓަނޭޝަނަލް އެއާޕޯޓުން ހައްޔަރުކޮށްފައިވަނީ ސ. ހިތަދޫ/ ސަމަންދަރު، އަހުމަދު އަހުސަން، 35އ. ކަމަށެވެ.

އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ފަސް ދުވަހަށް ބަންދުކުރަން އަމުރުކޮށްފައިވާ ކަމަށްވެސް ބުންޏެވެ.

މޯލްޑިވްސް ކަސްޓަމްސް އިން ބުނި ގޮތުގައި އޭނާ ރާއްޖެ އައީ މެލޭޝިއާ އެއާލައިންސްގެ ފްލައިޓަކުން ކަމަށާއި އޭނާގެ އަތުން 578 ގުރާމް މަސްތުވާތަކެތި ފެނުނު ކަމަށެވެ. އޭގެ ތެރޭގައި ހިމެނެނީ 48 ގުރާމް ހެރޮއިން އާއި 215 ގްރާމް ސިންތެޓިކް ކެތިނޯން އަދި 315 ގްރާމްގެ މެތް ކަމަށެވެ.