ދަރަނީގެ ކަންކަމުގައި ކުދި ޖަޒީރާ ގައުމުތަކުގެ ހާލަތަށް ރިއާޔަތްކުރަން ޖެހޭ: މުނައްވަރު

ދަރަނީގެ ދެމެހެއްޓިނިވަކަން ކަށަވަރުކުރުމުށް ދިމާވާ މައްސަލަތައް ހައްލުކުރަން ކުދި ޖަޒީރާ ގައުމުތަކުގެ ހާލަތަށް ރިއާޔަތްކޮށް އޮނިގަނޑަށް ބަދަލުތަކެއް ގެންނަން ޖެހިފައިވާ ކަމަށް އެމްއެމްއޭގެ ގަވަރުނަރު އަހުމަދު މުނައްވަރު ވިދާޅުވެއްޖެ އެވެ.

ވޮޝިންޓަނުގައި މިހާރު ކުރިއަށްދާ އިންޓަނޭޝަނަލް މަނިޓަރީ ފަންޑު (އައިއެމްއެފް) އަދި ވާލްޑް ބޭންކުގެ ޕްލީނަރީގެ ޗެއާގެ ހައިސިއްޔަތުން ދެއްވި ތަގުރީގުގައި މުނައްވަރު މިއަދު ވިދާޅުވީ، ކުރިއަރަމުން އަންނަ އިގުތިސޯދުތަކުގެ ތިން ބައި ކުޅަ ދެ ބައި ގައުމުތަކަށް ދަރަނި ދެއްކުމުގައި ނުރައްކާތަކެއް ދިމާވަމުންދާ ކަމަށެވެ.

މުނައްވަރު ވިދާޅުވީ ގްލޯބަލް ސޮވަރިން ޑެޓް ރައުންޑްޓޭބަލްގައި ގުޅިގެން މަސައްކަތްތަކެއް ކުރަން ބާރު އެޅި ނަމަވެސް، އިތުރު ފިޔަވަޅުތައް ބޭނުންވާ ކަމަށެވެ. އޭނާ ވިދާޅުވީ މަދުން އާމްދަނީ ލިބޭ ގައުމުތަކުގެ ޑެޓް ސަސްޓެއިނަބަލިޓީ ފްރޭމްވޯކް ރިވިއުގައި ގައުމުތަކުގެ ހާލަތަށް ރިއާޔަތްކުރެވިގެން ބަދަލުތަކެއް ހިމަނަން ގޮވައިލާ ކަމަށެވެ.

”އައިއެމްއެފް އާއި ވާލްޑް ބޭންކާއި މަލްޓިލެޓަރަލް ޑިވެލޮޕްމަންޓް ބޭންކުތަކުން ދަރަނީގެ އުނދަގޫތައް ދިމާވެފައި ހުރި ގައުމުތަކަށް އެހީތެރިވާން މާނަވީ ފިޔަވަޅުތަކެއް އަޅަން ޖެހޭ. މަލްޓިލެޓަރަލް ޑިވެލޮޕްމަންޓު ބޭންކުތަކުން، ކްލައިމެޓް އެޑެޕްޓޭޝަނަށް ކުރާ އިންވެސްޓުމަންޓުތަކުގެ މުގާބިލުގައި ދަރަނީގެ ލުއި ދޭ ގޮތަށް، ޑެޓް-ފޯ-ކްލައިމެޓް ކަހަލަ އާލަތްތައް އުފައްދަން ޖެހޭ“ މުނައްވަރު ވިދާޅުވި އެވެ.

މޫސުމަށް އަންނަ ބަދަލުތަކުގެ ދިމާވާ ނުރައްކަލުން ސަލާމަތްވުމަށާއި މޫސުމީ ބަދަލުގެ ނުރައްކާތައް ކުޑަކުރުމަށް ރާއްޖެއިން ދަނީ މަސައްކަތް ކުރަމުން ކަަމަށް މުނައްވަރު ވިދާޅުވި އެވެ.

އެގޮތުން ރާއްޖެއިން ވަނީ 2028 ކުރިން މި ގައުމުގައި ބޭނުންކުރާ ކަރަންޓުގެ 33 ޕަސެންޓު އިޔާދާކުރަނިވި ހަކަތައަށް ބަދަލުކުރަން އަމާޒު ހިފާފައި ކަމަށާއި މި އަމާޒަށް ވާސިލުވުމުން މޫސުމީ ބަދަލަށް ވިލުންވެރި ވުމުގެ އިތުރުން، މާލިއްޔަތުންނާއި ބޭރު ފައިސާއިން ކުރަން ޖެހޭ ހަރަދުތަކުގެ ބޮޑު ބަޔެއް ސަލާމަތްކުރެވޭނެ ކަމަށް މުނައްވަރު ވިދާޅުވި އެވެ.

”2028 ވަނަ އަހަރު ދިވެހިރާއްޖޭގައި 33 އިންސައްތަ ކަރަންޓް އިއާދަކުރުވަނިވި ހަކަތައިން އުފެއްދުމަށް ވަނީ އަޒުމް ކަނޑައަޅާފައި. މި މަޝްރޫއުއަށް ގާތްގަނޑަކަށް 1.3 ބިލިއަން ޑޮލަރު ބޭނުންވާއިރު، އަދި މިހާތަނަށް ހިލޭ އެހީގެ ގޮތުގައި ލިބިފައިވަނީ އެންމެ 13 އިންސައްތަ،“ މުނައްވަރު ވިދާޅުވި އެވެ.

މުނައްވަރު އިތުރަށް ފާހަގަކުރެެއްވީ ސްޓްރަކްޗަރަލް އިސްލާހުތައް ގެންނަ ވާހަކަ އެވެ. އެގޮތުން ތަރައްގީ ވަމުން އަންނަ އިގުތިސާދުތަކުގެ އުފެއްދުންތެރިކަމާއި ދައުލަތުގެ ގާބިލުކަން ވަރުގަދަ ކުރަން ޖެހޭ ކަމަށް އޭނާ ވިދާޅުވި އެވެ. އެގޮތުން އައިއެމްއެފް އާއި ވާލްޑް ބޭންކުން ވަޒިފާ އުފެއްދުމާއި، ހަމަހަމަ ފުރުސަތުތަކާއި، އިގުތިސޯދު ސިންދަފާތުކުރުމާއި ރެފިއުޖީން ގިނަ ވުމުން ކުރާ އަސަރުތަކަށް އަހައްމިއްޔަތުކަން ދޭން ޖެހޭ ކަމަށް މުނައްވަރު ވިދާޅުވި އެވެ.