މިއަދަކީ ކެރޭ، ގާބިލު ލަޝްކަރެއް އޮތްކަން ދުނިޔެއަށް ދައްކަންވީ ދުވަސް: ގައްސާން

މިއަދަކީ ހަރަކާތްތެރިވުމުގައި ހުށިޔާރު، ކެރޭ، ހީވާގި، ގާބިލު، ދިވެހި މިނިވަންކަން ދިފާއުކުރުމަށް ތައްޔާރަށް އޮތް ލަޝްކަރެއް އޮތްކަން މުޅި ދުނިޔެއަށް ދައްކަންވީ ދުވަސް ކަމަށް ޑިފެންސް މިނިސްޓަރު ގައްސާން މައުމޫން ވިދާޅުވެއްޖެ އެވެ.

ދަރުބާރުގޭގައި ރޭ ބޭއްވި ނަސްރުގެ ދުވަހުގެ ރަސްމީ ޖަލްސާގައި ގައްސާން ވިދާޅުވީ، 3 ނޮވެމްބަރު 1988 ގައި ދުޝްމަނުންގެ މައްޗަށް ނަސްރާއި ފަތަހަ ހޯދީ ﷲ ވާގިފުޅާއެއްކޮށް ފަހުރުވެރި ދިވެހި ސިފައިން ކަމަށެވެ. އަދި އެ ދުވަހުގެ ހާދިސާ ވެގެންދިޔައީ ދިވެހި އަސްކަރިއްޔާގެ ގާބިލުކަން އިތުރުކުރަން ޖެހިއްޖެކަމުގެ ރަނގަބީލަށް ކަމަށާއި އެ މަސައްކަތް އޭރު ފެށި ނަމަވެސް އެ މަސައްކަތް މިހާރު ހުއްޓިފައިވާ ކަމަށް ވިދާޅުވި އެވެ.

”އެ މަސައްކަތް އޭރު ފެށިގެން އައިސް 20 އަހަރު ހުއްޓިފައި އޮތުމަށްފަހު އާ ބާރަކާއި އާ ރޫހަކާއި އާ ޖޯޝަކާއެއްކޮށް އަލުން ފެށިގެން ދިޔައީ އޭގެ 15 އަހަރު ފަހުން މިދިޔަ ނޮވެމްބަރު މަހުގެ 17 ވަނަ ދުވަހު ސިފައިންގެ އެންމެ މަތީވެރިޔާގެ ހައިސިއްޔަތުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދިވެހި ގައުމުގެ ހިމާޔަތުގައި ދިވެހިރާއްޖޭގެ މިނިވަންކަމާއި ސިޔާދަތާއި އިސްތިގުލާލުގެ ހިމާޔަތުގައި ދަންމަވާލެއްވި ފަލަ ރަތް ރޮނގާއެކީ،“ ގައްސާން ވިދާޅުވި އެވެ.

އޭނާ ވިދާޅުވީ، ދިވެހި އަސްކަރިއްޔާ ދެމި އޮތްހާ ހިނދަކު ރާއްޖޭގެ މިނިވަންކަމާއި ސިޔާދަތާއި އިސްތިގުލާލު ސިފައިންގެ ހުވާގައިވާ ގޮތުގެ މަތިން، ލެޔާއި ފުރާނައިން ގުރުބާންވެގެން ހިމާޔަތް ކުރާނެ ކަމަށާއި އެއީ ޔަގީންކުރައްވާ ކަމެއް ކަމަށެވެ.

”މިއަދަކީ މި ހަގީގަތްތަކުގެ މައްޗަށް އިތުރަށް ފިކުރުކުރަންވީ ދުވަސް. މިއަދަކީ ރައީސް އެ ގެނެސްދެއްވާ ވަސީލަތްތައް ގައުމުގެ ދިފާއުއަށް އަތުރާލަން ވިލަރެސް ކުރަންވީ ދުވަސް. މިއަދަކީ ގައުމަށް ވަފާތެރި، ރައްޔިތުންނަށް އިހުލާސްތެރި، އަމުރަށް ކިޔަމަންތެރި، ހަރަކާތްތެރިވުމުގައި ހުށިޔާރު، ކެރޭ، ހީވާގި، ގާބިލު، ދިވެހި މިނިވަންކަން ދިފާއުކުރުމަށް ތައްޔާރަށް އޮތް ލަޝްކަރެއް އޮތްކަން މުޅި ދުނިޔެއަށް ދައްކަންވީ ދުވަސް،“ ގައްސާން ވިދާޅުވި އެވެ.