އާބަން ސެންޓަރު ހެދުމުގެ މަގުސަދަކީ މާލޭން އެ ރަށްތައް ހިންގަން ފެށުމަށް ވެގެން ނުވާނެ: ޝާހިދު

އާބަން ސެންޓަރުގެ ގޮތުގައި ރަށްތަކެއް ކަނޑައެޅުމުގެ މަގުސަދަކީ ލާމަރުކަޒީ ނިޒާމުން ރަށްރަށް ހިންގުމުގެ ނިޒާމުން އެ ރަށްތައް ވަކިކޮށް މާލެއިން ހިންގަން ފެށުން ކަމުގައި ވެގެން ނުވާނެ ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.

އާބަން ސެންޓަރުތަކުގެ ގޮތުގައި ތަރައްގީ ކުރާނެ ހަތް ރަށެއް ރައީސް މުހައްމަދު މުއިއްޒު ކަނޑައަޅުއްވައި، ހައުސިން މިނިސްޓްރީން އެ ރަށްތައް މިއަދު ވަނީ އިއުލާންކޮށްފަ އެވެ.

އެކަމާ ގުޅިގެން ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވީ އާބަން ސެންޓަރު ކަނޑައެޅުމުގައި ބޮޑުތިލަދުންމައްޗާއި ރާއްޖޭގެ ދެކުނުގެ ސަރަހައްދު އުނިވެފައި މިވާ ސަބަބު އެ ސަރަހައްދުތަކުގައި ދިރިއުޅޭ ރައްޔިތުންނަށް ސަރުކާރުން ސާފުކޮށްދޭންޖެހޭ ކަމަށެވެ.

އަދި އެފަދަ ކަންކަން ނިންމުމުގައި ރަށު ކައުންސިލްތަކާއި އަތޮޅު ކައުންސިލްތަކުގެ މަޝްވަރާ ހޯދުމަކީ މުހިންމު ކަމެއް ކަމަށްވެސް ވިދާޅުވި އެވެ.

• ރ. އުނގޫފާރު
• ބ. އޭދަފުށި
• ޅ. ނައިފަރު
• އދ. މަހިބަދޫ
• ފ. ނިލަންދޫ
• ދ. ކުޑަހުވަދޫ
• ލ. ފޮނަދޫ

• ހއ. އަތޮޅާއި، ހދ. އަތޮޅު އަދި ށ. އަތޮޅު ހިމެނޭ އުތުރުގެ ތަރައްގީގެ ޒޯނުގައި މައި ހަބަކީ ހދ. ކުޅުދުއްފުށި
• ގއ. އަތޮޅާއި، ގދ. އަތޮޅާ، ފުވައްމުލަކު ސިޓީ އަދި އައްޑޫ ސިޓީ ހިމެނޭ ދެކުނުގެ ތަރައްގީގެ ޒޯނުގައި މައި ހަބަކީ އައްޑޫ ސިޓީ