ޔާމީން ގެއަށް ބަދަލުކުރީ އެއްވެސް ބޭފުޅަކު އެދިގެނެއް ނޫން: އިބޫ

ކުރީގެ ރައީސް އަބްދުﷲ ޔާމީން ގެއަށް ބަދަލުކުރީ އެއްވެސް ބޭފުޅަކު އެދިވަޑައިގެން ނޫން ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.

ރާއްޖެ ޓީވީގެ ”ފަށާއިރު“ ޕްރޮގްރާމުގައި މިއަދު ވާހަކަދައްކަވަމުން ސޯލިހު ވިދާޅުވީ ރިޔާސީ އިންތިހާބުގެ ކެމްޕޭން ދުވަސްވަރު މިހާރުގެ ރައީސް ޑރ. މުހައްމަދު މުއިއްޒު ވަނީ، ވެރިކަމަށް އިންތިހާބުވެވަޑައިގެން ޔާމީން ޖަލު ބަންދުން ދޫކުރައްވާނެ ކަމަށް އެތަކެއްފަހަރު ވައުދުވެވަޑައިގެންފައި ކަމަށެވެ. ނަމަވެސް ވެރިކަމަށް އިންތިހާބު ވެވަޑައިގެންނެވިފަހުން، ޔާމީން މިނިވަންކުރެއްވުމާ ގުޅޭ އެއްވެސް ވާހަކައެއް ރައީސް މުއިއްޒު، ދައްކަވައިފައިނުވާ ކަމަށެވެ.

ސޯލިހު ވިދާޅުވީ ރައީސް މުއިއްޒު ވެސް އަދި ރައްޔިތުންގެ މަޖިލީހުގެ މިހާރުގެ ރައީސް އަބްދުރަހީމް އަބްދުﷲ ވެސް ޔާމީން މިނިވަންކުރުމަށް އެދިވަޑައިގެންފައިނުވާ ކަމަށެވެ.

ޔާމީން މިނިވަންކުރެއްވުމަށް ނިންމެވީ އަމިއްލަފުޅަށް އެ މަނިކުފާނު ކަމަށް ސޯލިހު ވިދާޅުވި އެވެ.

”ކުރިގެ ރައީސަކު ހުކުމެއް ތަންފީޒްކުރަމުންދާއިރު އެކަމާއި ބެހޭ ގޮތުން ކަމެއް ކުރާއިރު ކަރެކްޝަންސް އާއި ހޯމް މިނިސްޓްރީން، ރައީސަކަށް ހުންނަ މީހަކާ އެ ބޭފުޅުން މަޝްވަރާކުރާނެ. އެއީ އަޅުގަނޑާއި މަޝްވަރާކުރި ގޮތަކީ. އެއީ އެއްވެސް ހާލެއްގައި އިންތިހާބީ ރައީސް އަދި މިހާރުގެ މަޖިލީހުގެ ރައީސް އެދިވަޑައިގެން ކުރި ކަމެއް ނޫން. އެހެނެއް ނޫން އޭގެ އެއް އަހަރު ކުރިން ރައީސް ޔާމީންގެ މައްޗަށް ދެ ހުކުމެއް އައެއް ނޫންތޯ، ދެއްތޯ. ފުރަތަމަ ހުކުމް ތަންފީޒްކުރަމުން ދިޔަ އިރު ވަރަށް ގިނަ ބޭފުޅުން މެސެޖުކުރެއްވި. އޭގެ ތެރެއިން ގިނަ ބޭފުޅުންނަކީ މަޖިލީހުގަ އަޅުގަނޑާއި އެކު ތިބި މީހުން. އޭގެ ތެރޭގައި މުއިއްޒު ވެސް ހިމެނޭ. އިންތިހާބީ ކަންކަމުގަ އުޅުއްވިތަން އަޅުގަނޑަށް ފެނުނީ. ފަހަރުގަ ވެދާނެ ހިޔާލިތަފާތުވުންތަކެއް އުޅެނީކަމަށް. އެއްވެސް ހާލެއްގައި ރައީސް ޔާމީން މިނިވަން ކުރީ އެ ބޭފުުޅުން ވިދާޅުވެގެނެއް ނޫން. އެއްވެސް ރިކުއެސްޓެއް ނެތް“ ސޯލިހު ވިދާޅުވި އެވެ.

ރައީސް މުއިއްޒު ވެރިކަމަށް އިންތިހާބުވެވަޑައިގެންނެވި ދުވަހުގެ ރޭ އެ މަނިކުފާނަށް ގުޅުއްވާފައިވާނެ ކަމަށާއި އެ ރޭ ވެސް ޔާމީން ދޫކޮށްލުމުގެ ވާހަކަ އެއްވެސް މިންވަރަކަށް ރައީސް މުއިއްޒު ފާހަގަ ނުކުރައްވާ ކަމަށް ސޯލިހު ވިދާޅުވިއެވެ. އެފަހުން ރައީސް މުއިއްޒުއާ ބައްދަލުކުރައްވާފައިވާނެ ކަމަށް ސޯލިހު ވިދާޅުވި އެވެ.

ސޯލިހު ވިދާޅުވީ އެ ބައްދަލުވުމުގައި ޔާމީން، ގެއަށް ބަދަލުކުރުމަށް ނިންމައި، މާލެ ގެނައުމުގެ ކަންކަން ފަށައިފައިވާނެ ކަމަށް ރައީސް މުއިއްޒަށް ދަންނަވައިފައިވާނެ ކަމަށެވެ. އެ ވާހަކަ ދެންނެވުމުން ރައީސް މުއިއްޒަށާއި އަބްދުއްރަހީމަށް ލިބިގެންދިޔައީ ކުއްލި ހައިރާންކަމެއް ކަމަށް ސޯލިހު ވިދާޅުވިއެވެ. އެ ހިސާބުން އެ ދެ ބޭފުޅުންނަށް ވެސް ޔާމީން މިނިވަން ކުރާކަން ނޭނގޭކަން ހާމަވިކަމަށް ސޯލިހު ވިދާޅުވި އެވެ.

ޔާމީން، މާލެ ވަޑައިގަންނަވާއިރު ރައީސް މުއިއްޒުއާއި އަބްދުއްރަހީމް ވެސް އެ ތަނުގައި ތިއްބަވަން ބޭނުންފުޅުވާނެ ކަމަށް ގަބޫލުކުރައްވާތީ، ރައީސް އޮފީހުގައި އޮތް ބައްދަލުވުން ކުރުކޮށްލުމަށް ފަހު ޔާމީން މާލެ ގެންނަ ތަނަށް ވަޑައިގަންނަވަން ފެނިވަޑައިގަންނަވާ ކަމަށް އެ ދެ ބޭފުޅުންނަށް އެ ދުވަހު ދަންނަވާފައިވާނެ ކަމަށް ސޯލިހު ވިދާޅުވި އެވެ.