އައިކޮމްގެ އަޑުއެހުމަށް ހާޒިރުނުވުމުން ހައުސިން މިނިސްޓްރީ ޖޫރިމަނާކޮށްފި

އިންފޮމޭޝަން ކޮމިޝަނަރު އޮފީސް (އައިކޮމް)އިން ބަލަމުންދިޔަ މައްސަލައެއްގެ އަޑުއެހުމަށް ހައުސިން މިނިސްޓްރީ ހާޒިރުނުވުމުން 350 ރުފިޔާއިން ޖޫރިމަނާކޮށްފި އެވެ.

އައިކޮމްއިން މިއަދު ބުނީ މައުލޫމާތު ހޯދައި ލިބިގަތުމުގެ ގާނޫނުގެ ދަށުން ހައުސިން މިނިސްޓްރީއަށް ހުށަހަޅައިފައިވާ ހުށަހެޅުމަކަށް އެ މިނިސްޓްރީން އެއްވެސް ޖަވާބެއް ނުދިން މައްސަލަ އައިކޮމްއަށް ހުށަހަޅައިފައިވާ ކަމަށެވެ. އެހެންވެ އެ މައްސަލަ ބެލުމަށް މިމަހު ހަތްވަނަ ދުވަހަށް އަޑުއެހުމެއް ތާވަލުކޮށްފައިވާނެ ކަމަށެވެ.

ނަމަވެސް އެ އަޑުއެހުމަށް ހައުސިން މިނިސްޓްރީން ހާޒިރުވެފައިނުވާ ކަމަށް އައިކޮމްއިން ބުންޏެވެ.

އަޑުއެހުމަށް ހާޒިރުވުމަށް އަންގާ އެންގުމަށް މަގުބޫލު ސަބަބެއް މެދުވެރިވެގެން ހާޒިރުވެވެން ނެތް ނަމަ ބައްދަލުވުން ފެށުމަށް ކަނޑައަޅާފައިވާ ގަޑީގެ މަދުވެގެން އެއް ގަޑިއިރުގެ ކުރިން އެކަން އަންގަން ވާނެ ކަމަށް މައުލޫމާތު ހޯދައި ލިބިގަތުމުގެ ގަވާއިދުގައި ބަޔާންކޮށްފައިވީ ނަމަވެސް އެފަދަ އެއްވެސް ސަބަބެއް ހައުސިން މިނިސްޓްރީގެ ފަރާތުން ހުށަހަޅައިފައިނުވާ ކަމަށް އައިކޮމްއިން ބުންޏެވެ.

ހައުސިން މިނިސްޓްރީ ޖޫރިމަނާ ކުރީ އެ ގަވައިދާ އެއްގޮތަށް އަމަލުކޮށްފައި ނުވާތީ ކަމަށް އައިކޮމްއިން ބުންނެވެ.