ސަރުކާރުން ދިން ފުރުސަތުގެ ބޭނުން ހިފައިގެން ގިނަ އަދަދެއްގެ ގޭންގުތަކުގެ މީހުން އުޅެނީ ވިޔަފާރިކުރުމާއި ވަޒީފާތަކުގައި ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.
ސަލްޓަން ޕާކުގައި ރޭ ބޭއްވި ’އަހާ‘ ފޯރަމްގައި ވާހަކަދައްކަވަމުން އިހުސާން ވިދާޅުވީ, 2007 އިން ފެށިގެން އަދުގެ ރައީސް ޑރ. މުހައްމަދު މުއިއްޒު ވެރިކަމާ ހަވާލުވަންދެން, ކޮންމެ އަހަރަކު ދޭކާއި ފަހަކާ ދެމެދުގެ އަދަދެއްގެ މީހުން ގޭންގު މާރާމާރީތަކުގައި މަރާލެވިފައިވާ ކަމަށެވެ.
އެއީ ނަގައިގެންވާނެ ’ކޮސްޓް‘ އެއް ނޫން ކަމަށާއި އެ މައްސަލައަށް ދާއިމީ ހައްލެއް ގެނައުމަށްޓަކައި ގޭންގުތައް ހިންގާ ސަރަހައްދުތަކުގައި ފުލުހުން އިތުރުކޮށްފައިވާ ކަމަށާއި އެއާއެކު އެ މީހުންނަށް ކުރިން އުޅެވުނު މިނިވަންކަމުގައި މިހާރު ނޫޅެވޭނެ ކަމަށް ބުންޏެވެ.
”އެ މީހުންނަށް އަޅުގަނޑުމެން ދީފައިވާނެ ޗޮއިސްއެއް. އެ ޗޮއިސްއަކީ ހިނގާށޭ، ޒުވާން ކުދިންނޭ ތިއީ، ކުރިމަގު އަދި އެބަ އޮތޭ، މިކަމުން ދުރުހެލިވެ ރާއްޖެއަށް ފައިދާ ހުރިގޮތުގައި ވިޔަފާރިތަކުގައި އުޅެން، ވަޒީފާތަކަށް ދާން އެ ފުރުސަތު މިހާރު ދީފައި އޮންނާނީ. އުފަލާއެކު ފާހަގަކޮށްލާ ކަމަކީ އޭގެ ތެރެއިން ވަރަށް ގިނަ އިހްތިޔާރުކުރީ އެ މަގު,“ އިހުސާން ވިދާޅުވި އެވެ.
