ރައީސް މުއިއްޒަށް ތުހުމަތުވާ ކޮރަޕްޝަންގެ ވާހަކަ ދެއްކުމުން މަޖިލިސް ރައީސް އެންގެވީ ފްލޯކް ވާހަކަ ނުދައްކަން

ރައްޔިތުންގެ މަޖިލީހުގެ މިއަދުގެ ޖަލްސާގައި ރައީސް ޑރ. މުހައްމަދު މުއިއްޒަށް ތުހުމަތުވާ ހިޔާނާތުގެ ވާހަކަތައް މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ދައްކަވަން ފެށުމުން އެކަން ހުއްޓުވައި، ފްލޯކް ވާހަކަ ނުދެއްކުމަށް މަޖިލީހުގެ ރައީސް އަބްދުއްރަހީމް އަބްދުﷲ އަންގަވައި ނަސޭހަތް ދެއްވައިފި އެވެ.

މިއަދުގެ ޖަލްސާގައި މައުރޫފު ވިދާޅުވީ އޭނާއަށް މިއަދު ވާހަކަ ދެކެވޭނީ ޕާޓީން އަންގާ ގޮތަކަށް ކަމަށާއި އޭނާ ނިސްބަތްވާ އެމްޑީޕީން އަންގަނީ ރައީސް މުއިއްޒަށް ތުހުމަތު ކުރެވޭ ނޫމަޑި ހިޔާނާތުގެ ވާހަކަ ދެއްކުމަށް ކަމަށެވެ. ޕާޓީން އޭނާއަށް އެގޮތަށް އެންގުމުން ރައީސް މުއިއްޒުގެ ކޮރަޕްޝަންގެ ވާހަކަތައް ދެއްކުން ނޫން އެހެން ގޮތެއް ނެތް ކަމަށްވެސް ވިދާޅުވި އެވެ.

”އިއްޒަތެރި މެންބަރު އަޅުގަނޑު ހަމަ މި ތަކުރާރުކޮށް ކޮންމެ ދުވަހަކު ވެސް ދަންނަވަން މަޖިލީހުގެ ތަޅުމުގައި ވާހަކަފުޅު ދައްކަވަންވާނީ ހަގީގަތުގެ މައްޗަށް ބިނާކޮށޭ. ފްލޯކު ވާހަކަ ދައްކަވާ ރައްޔިތުންނަށް ހަގީގަތް އޮޅޭ ގޮތަށް ވާހަކަ ދެއްކުމަކީ މި މަޖިލީހުގެ އިއްޒަތެރި މެންބަރުން ކުރައްވައިގެން ވާނެ ކަމެއް ނޫން،“ އަބްދުއްރަހީމް ވިދާޅުވި އެވެ.

ނޫމަޑިއަކީ ކުރީގެ ރައީސް މުހައްމަދު ނަޝީދުގެ ސަރުކާރުގައި އަތޮޅުތެރޭގައި ހައުސިން ޔުނިޓުތަކެއް އަޅަން ހަވާލުކުރި ކުންފުންޏެކެވެ. އެއްބަސްވުމާ އެއްގޮތަށް މަސައްކަތް ކުރިއަށް ނުދާ ކަމަށް ބުނެ، އެ ކުންފުންޏާ އެކު ވެފައިވާ އެއްބަސްވުން ބާތިލުކުރީ ރައީސް މުއިއްޒު، ހައުސިން މިނިސްޓަރަކަށް ހުންނެވި އިރު އެވެ.

އެއްބަސްވުންތައް ޔާމީންގެ ސަރުކާރުން ބާތިލު ކުރި މައްސަލައިގައި ނޫމަޑިން، ނެދަލޭންޑްސްގެ ދަ ހޭގްގައި ހުންނަ ޕާމަނަންޓް ކޯޓް އޮފް އާބިޓްރޭޝަނަށް ހުށަހެޅީ 155 މިލިއަން ޑޮލަރު (2.3 ބިލިއަން ރުފިޔާ) އަދި އާބިޓްރޭޝަނާ ގުޅޭ އެހެން ހަރަދުތައް ހޯދުމަށެވެ. އެ މައްސަލައިގެ އާބިޓްރޭޝަންގައި ރައީސް މުއިއްޒު ބަޔާން ދިނީ ނޫމަޑިއާ އެއްކޮޅަށް، ދިވެހި ދައުލަތާ ދެކޮޅަށެވެ. އަދި ރައީސް މުއިއްޒު ދިވެހި ދައުލަތާ ދެކޮޅަށް އާބިޓްރޭޝަނަށް ދޮގު ބަޔާން ދިން ކަމަށް ތުހުމަތުކޮށް ދޮގު ބަޔާން ދިނުމުގެ ދައުވާވެސް ކުރި އެވެ.

ރައީސް މުއިއްޒުގެ މައްޗަށް އެ ދައުވާތައް ދައުލަތުން ކުރީ ހައުސިން މިނިސްޓަރުކަމުގެ މަގާމުގައި ހުންނަވައި އެ މަނިކުފާނު އަމިއްލައަށް ނިންމެވި ނިންމުންތަކެއް އެއީ ދޮގެއް ކަމަށް ވިދާޅުވެ، މިނިސްޓަރު ކަމުގެ މަގާމުން ވަކިވެވަޑައިގަތުމަށްފަހު އާބިޓްރޭޝަނަށް ބަޔާން ދެއްވި ކަމަށް ބުނެ އެވެ.

ރައީސް މުއިއްޒު އެ ދައުވާއަށް އިންކާރު ކުރެއްވި އިރު، އެ ދައުވާ އެ މަނިކުފާނުގެ މައްޗަށް ސާބިތެއް ނުވި އެވެ. އެހެންވެ ކޯޓުގައި އެ މައްސަލަ ހިނގަނިކޮށް، ނޫމަޑިއާ ވާހަކަދައްކައި ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން އެ ކުންފުންޏަށް 55 މިލިއަން ޑޮލަރު (849،750،000ރ.) ބަދަލެއް ދޭން ނިންމި އެވެ.

ސަރުކާރުން އޭރު ބުނީ، ބަދަލު ދޭން ނިންމީ އެ މައްސަލަ އޭބިޓްރޭޝަނުން ނިންމައި، ބޮޑު އަދަދެއް ދޭން ޖެހިއްޖެ ނަމަ ދައުލަތަށް ލިބޭނެ ގެއްލުން ބޮޑުވާނެ ކަމަށް ބެލެވޭތީ ކަމަށެވެ. އަދި އެ ފައިސާ މިހާރު އެ ކުންފުންޏަށް ދީފައިވާނެ ކަމަށްވެސް ބުންޏެވެ.

ކޯޓުން ބޭރުގައިވެސް އެހާ ބޮޑު ބަދަލެއް ދޭން ޖެހުނު އެއް ސަބަބަކީ، ދައުލަތާ ދެކޮޅަށް އާބިޓްރޭޝަންގައި ރައީސް މުއިއްޒު ހެކިބަސް ދެއްވުން ކަމަށް ސަރުކާރުން އޭރު ތުހުމަތު ކުރި އެވެ.