މަޓީން އެދުމުން ބޭރު ފައިސާގެ ބިލުގެ ކޮމެޓީ ސިއްރުކޮށްފި

ބޭރު ފައިސާއާ ބެހޭ ބިލާ ގުޅޭ ގޮތުން މޯލްޑިވްސް އެސޯސިއޭޝަން ފޯ ޓޫރިޒަމް އިންޑްސްޓްރީ (މަޓީ)ގެ ބޭފުޅުންނާ އެކު ރައްޔިތުންގެ މަޖިލީހުގެ މާލިއްޔަތު ކޮމެޓީ އިން މިއަދު ކުރިއަށް ގެންދާ ބައްދަލުވުން މަޓީން އެދިގެން ސިއްރުކޮށްފި އެވެ.

މާލިއްޔަތު ކޮމިޓީގެ އެ ބައްދަލުވުން ބޭއްވުމަށް ތާވަލުކޮށްފައިވަނީ މިއަދު ހެނދުނު 10:30 ގަ އެވެ. އެ ބައްދަލުންވުން ފެށުމުގެ ގޮތުން ވާހަކަދައްކަވަމުން މާލިއްޔަތު ކޮމެޓީގެ މުގައްރިރު އޭދަފުށީ ދާއިރާގެ މެންބަރު އަހުމަދު ސަލީމް ވިދާޅުވީ ކޮމިޓީ ބައްދަލުވުން ސިއްރުކުރުމަށް މަޓީން އެދިފައިވާ ކަމަށެވެ.

ސަލީމް އެގޮތަށް ވިދާޅުވުމުން ބާރަށު ދާއިރާގެ މެންބަރު އިބްރާހިމް ޝުޖާއު ވަނީ މަޓީން އެދުނު ގޮތަށް ކޮމިޓީ ސިއްރުކޮށްގެން ކުރިއަށް ގެންދިޔުމަށް ހުށަހަޅުއްވައިފަ އެވެ. އެ ހުށަހެޅުމަށް ތާއީދުކުރެއްވީ ހަނިމާދޫ ދާއިރާގެ މެންބަރު އަބްދުލް ގަފޫރު މޫސާ އެވެ.

މާލިއްޔަތު ކޮމިޓީގެ އެ ބައްދަލުވުން ސިއްރު ކުރުމަށް ފާސްވީ ފާސްވީ ކޮމެޓީގައި ބައިވެރިވެވަޑައިގެންނެވި މެންބަރުންގެ އިއްތިފާގުންނެވެ. ބޭރު ފައިސާއާ ބެހޭ ބިލުގެ މަސައްކަތް މިއަދު ނިންމަން ވެސް ކޮމެޓީން ވަނީ ފާސްކޮށްފަ އެވެ. އެހެންވެ މިއަދު ހަވީރު 6 ޖެހުމާ ހަމައަށް ކޮމެޓީގެ މަސައްކަތް ކުރިއަށް ގެންގޮސް މަސައްކަތް ނިންމުމަށް ޝުޖާއު ހުށަހެޅުއްވުމުން އެ ހުށަހެޅުއްވުމަށް ތާއީދު ކުރެއްވީ ފުވައްމުލައް އުތުރު ދާއިރާގެ މެންބަރު ހަމަދު އަބްދުﷲ އެވެ.

ސަރުކާރުގެ ފަރާތުން މަޖިލީހަށް ހުށަހެޅި ބޭރު ފައިސާއާ ބެހޭ ބިލުގަި ވަނީ ރިސޯޓުތަކުން އަންނަ ކޮންމެ ޓޫރިސްޓެއްގެ ބޮލަކަށް 500 ޑޮލަރު މާރުކުރަން ނިންމި ނިންމުން އިހުތިޔާރީ ކަމަކަށް ހަދައި ބޮލަކަށް 500 ޑޮލަރު ނޫނީ އާމްދަނީގެ 20 ޕަސަންޓް މާރުކުރުމުގެ އިހުތިޔާރު ރިސޯޓްތަކަށް ދޭ ގޮތަށެވެ.

އެ ބިލުގައި ޑޮލަރު މާރުކުރުމަށް ލުއި ދިނުމާ އެކު ރިސޯޓްތަކަށް އިތުރު ލުއިދޭން ވެސް ވަނީ ހިމަނައިފަ އެވެ. އެ ލުއިތަކުވެ ތެރެއިގައި، 10 އަހަރުން ދަށުގެ ކުދިން، ރިސޯޓްތަކުގައި ހިލޭ ބައިތިއްބާ ފަރާތްތައް އަދި ސަރުކާރުން ހާއްސަ އިމްތިޔާޒް ދީފައިވާ މެހެމާނުންގެ އަތުން 500 ޑޮލަރު މާރުކުރަން ނުޖެހޭނެ އެވެ.

މީގެ އިތުރުން 50 ކޮޓަރިއަށް ވުރެ މަދު ކޮޓަރި ހިމެނޭ ޓޫރިސްޓުންނަށް ހިދުމަތް ދޭ ތަންތަން ހިމެނޭ ކެޓެގަރީ ބީގެ އެސްޓެބްލިޝްމަންޓުތަކުން އާމްދަނީގެ 20 ޕަސަންޓް މާރުކުރުމުގެ އިހުތިޔާރު ލިބެ އެވެ.

މިހާރު އަމަލުކުރަމުން އަންނަ ބޭރު ފައިސާގެ ގަވާއިދުގައި އޮތީ އެއިން ތަނަކަށް އަންނަ ކޮންމެ ޓޫރިސްޓަކަށް 25 ޑޮލަރު މާރުކުރަން ޖެހޭ ގޮތަށެވެ.