ކާނި ހޮޓަލްސްއިން ޓެކުހަށް މަކަރުހެދި މައްސަލައެއް ތަހުގީގުކޮށްދިނުމަށް އެދިއްޖެ

ކ. މާފުށީގައި ކާނި ހޮޓެލްސް“ ނަމުގައި ހިންގަމުން ގެންދާ ހަތަރު ގެސްޓްހައުސް ވިޔަފާރިއަކުން ގަސްދުގައި ޓެކުހަށް މަކަރުހެދިކަމަށް ތުހުމަތުކުރެވޭތީ، ޖިނާއީ މައްސަލައެއްގެ ގޮތުގައި އެ މައްސަލަ ތަހުގީގުކޮށް، ދައުވާކޮށްދިނުމަށް އެދި ޕްރޮސިކިއުޓާ ޖެނެރަލްގެ އޮފީހަށް މީރާއިން ހުށަހަޅައިފި އެވެ.

އެކަން ހާމަކޮށް މީރާއިން މިއަދު ބުނީ މި މައްސަލައަކީ ކާނި ހޮޓެލްސް ނަމުގައި ހިންގަމުން ގެންދާ ”ކާނި ޕާމް ބީޗް“ ”ކާނި ގްރޭންޑް ސީވިއު“، ”ކާނި ވިލެޖް“ އަދި ”ކާނި ބީޗް“ ގެސްޓްހައުސްތަކުން މީރާއަށް ހުށަހަޅައިފައިވާ ގްރީން ޓެކްސް، ޖީއެސްޓީ، ބީޕީޓީ އަދި އިންކަމް ޓެކްސް ބަޔާންތަކުގައި ދޮގު މައުލޫމާތު ހިމަނައިފައިވާކަމަށް ތުހުމަތުކުރެވޭތީ، އަދި އެކަން ކޮށްފައިވަނީ ގަސްދުގައި ޓެކްސް ދެއްކުމުން އެއްކިބާވުމުގެ ނިޔަތުގައިކަމަށް ބެލެވޭ މައްސަލައެއް ކަމަށެވެ. އެންމެ ފުރަތަމަ އެ މައްސަލަ ތަހުގީގުކޮށްފައިވަނީ މީރާއިން ކަމަށެވެ.

ކާނި ހޮޓަލްސްއިން ވަނީ 01 ޖަނަވަރީ 2019 އިން 30 ސެޕްޓެންބަރު 2022ގެ ނިޔަލަށް ހިމެނޭ ޓެކްސް ނެގޭ މުއްދަތުގެ ޓެކްސްއަށް މަކަރު ހަދައިފައި ކަމަށް ތުހުމަތުވާ ކަމަށް މީރާއިން ބުންޏެވެ.

”މި މައްސަލައިގައި، ކާނި ހޮޓެލްސް ވިޔަފާރީގައި ހިމެނޭ 2 ކުންފުނި ކަމުގައިވާ ކާނި ހޮޓެލްސް އެންޑް ޓުއާސް ޕްރައިވެޓް ލިމިޓެޑް އާއި އަސްނާ އިންވެސްޓްމަންޓްސް ޕްރައިވެޓް ލިމިޓެޑްއާ، ކުންފުނިތަކުގެ 2 ޑިރެކްޓަރުން ކަމުގައިވާ އަބްދުﷲ ނަޝީދު އާއި އާމިނަތު އާސިމާ ސަލީމްގެ އިތުރުން ވިޔަފާރީގެ އެކައުންޓްސް މަސައްކަތުގައި އިސްކޮށް ހަރަކާތްތެރިވެފައިވާ އާއިޝަތު ރަޒުނާގެ މައްޗަށް ދައުވާކޮށްދިނުމަށް އެދި ޕްރޮސިކިއުޓާ ޖެނެރަލްގެ އޮފީހަށް މީރާއިން ހުށަހަޅައިފައިވެ އެވެ.“ މީރާއިން ބުންޏެވެ.

”މި ތަހުގީގާ ގުޅިގެން ކުރިއަށް ގެންދިޔަ ޖީއެސްޓީ އަދި ޖީއާރުޓީ އޮޑިޓުތަކުގައި ޖުމުލަ 8 ލައްކައަށް ވުރެ ގިނަ ޑޮލަރު (13.3 މިލިއަން ރުފިޔާ) އިތުރަށް ދައްކަންޖެހޭ ޓެކުހުގެ ގޮތުގައި ކަނޑައަޅައި އެ ޓެކްސް މީރާއަށް ދައްކަން އެ ފަރާތްތަކަށް އަންގައިފައިވެ އެވެ“ މީރާއިން ބުންޏެވެ.

މީރާއިން ބުނީ ކާނި ހޮޓެލްސްއާ ގުޅުންހުރި ވިޔަފާރިތަކުން މީރާއަށް ހުށަހަޅައިފައިވާ ޓެކްސް ބަޔާންތަކުގައި އެ ވިޔަފާރިއަށް އަންނަ އެންމެހައި ގެސްޓުންގެ މައުލޫމާތު ހިމަނައިފައި ނުވާ ކަމަށެވެ. އަދި ފްރީ އިންޑިޕެންޑެންޓް ޓްރެވެލާސްގެ ގޮތުގައި އަންނަ ގެސްޓުންގެ މައުލޫމާތާއި އާމްދަނީ ރިޕޯޓުކޮށްފައި ނުވާކަން ވެސް މީރާއިން ކުރިއަށް ގެންދިޔަ ތަހުގީގަށް ފާހަގަވެފައިވާ ކަމަށް މީރާއިން ބުންޏެވެ.

މީގެ އިތުރުން، އެއާޕޯޓް ޓްރާންސްފާ، ރެސްޓޯރަންޓް، ސްޕާ، އެކްސްކާޝަން ފަދަ ހިދުމަތްތަކުން ލިބޭ އާމްދަނީގެ ބޮޑުބައެއް ހުށަހަޅައިފައިނުވާ ކަމަށް މީރާއިން ބުންޏެވެ.

”މި ތަހުގީގުގައި މީރާއިން ވަނީ ޓެކްސް ދައްކާ ފަރާތްތަކުގެ ވިޔަފާރިއާ ގުޅޭ ލިޔެކިޔުންތައް ބަލަހައްޓާ އެ ފަރާތުގެ އޮފީސް ބަލައި ފާސްކުރުމުގެ އިތުރުން މައުލޫމާތު ހޯދުމަށާއި ކުށުގެ ތުހުމަތުގައި މީހުން ހާޒިރުކޮށް ބަޔާން ނަގައިފަ“ މީރާއިން ބުންޏެވެ.