އެޗްޑީސީން ވަކިކުރި 15 މުވައްޒަފުންނަށް އަލުން ވަޒީފާ ދީފި

އެމްޑީޕީ ސަރުކާރުން ކުރިއަށް ގެންދިޔަ ގެދޮރުވެރިޔާ/ބިންވެރިޔާ ސްކީމާ ގުޅޭ ގޮތުން ޖިނާއީ ތަހުގީގެއް ހިންގުމަށް ޕްރޮސެކިއުޓާ ޖެނެރަލް އައްބާސް ޝަރީފް ފުލުހުންނާއި އޭސީސީއަށް އަމުރުކޮށްފައިވާތީ އެ ޖިނާއީ ތަހުގީގަށް މަގުފަހި ކުރުމަށްޓަކައި އެޗްޑީސީގެ އެމްޑީ އިބްރާހިމް ފަޒުލް ރަޝީދުގެ އަރިސް މުވައްޒަފުންތަކެއް ވަކިކުރުމަށްފަހު އަލުން އެ މުވައްޒަފުންނަށް ވަޒީފާދީފި އެވެ.

އެޗްޑީސީން ވަޒީފާއިން 15 މުވައްޒަފަކު ވަކިކޮށްފައިވަނީ މިމަހުގެ 22 ގަ އެވެ. އެ މީހުންނަށް އަލުން ވަޒީފާ ދީފައިވަނީ އިއްޔެގެ ވަގުތެއްގަ އެވެ.

އެނގިފައިވާ ގޮތުގައި އެ މީހުންގެ ވަޒީފާ އަލުން އިއާދަކޮށްދިން ނަމަވެސް އެ މުވައްޒަފުން ތިއްބެވީ ސަސްޕެންޝަންގަ އެވެ.

ވަޒީފާއިން ވަކިކުރި މުވައްޒަފުންގެ ތެރޭގައި އެޗްޑީސީގެ ޗީފް ފައިނޭންޝަލް އޮފިސަރު އަބްދުﷲ ފާއިދުއާއި ޗީފް ބިޒްނަސް އޮފިސަރު އަދި މީޑިއާ ޑިޕާޓްމެންޓްގެ ހެޑް އަހުމަދު ޔާމީން ހިމެނެ އެވެ. އޭގެ އިތުރުން އެހެން ބައެއް މުވައްޒަފުން ވަނީ ސަސްޕެންޑުކޮށްފަ އެވެ.

ބިންވެރިޔާ ސްކީމްގެ މައްސަލަތަކެއް ސޯޝަލް މީޑިއާގައި މިމަހުގެ 18 ވަނަ ދުވަހު ފެންމަތިވީ، އެޗްޑީސީގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދުގެ ނަން އެ ސްކީމަށް ޝަރުތު ހަމަނުވާ ލިސްޓުގައި އޮއްވައި، ފަޒީލަށް ގޯތީގެ ރަޖިސްޓްރީއެއް ހަދައިދީފައި އޮތްކަން ފަޅާއެރުމުންނެވެ. އެކަން ފަޅާއަރުވާލީ ”ހަސަން ކުރުސީ “ ނަމަކަށް ޖަހައިފައިވާ އެކްސް އެކައުންޓަކުންނެވެ.

އެ މައްސަލަ ފެންމަތިވުމާއެކު ފުލުހުން ވަނީ އެޗްޑީސީއަށް ވެދެ ތަހުގީގަށް މައުލޫމާތު ހޯދުމުގެ ގޮތުން ބަލައިފާސްކޮށްފައެވެ. އަދި މައްސަލައިގެ ތަހުގީގަށް މަގުފަހިކުރުމުގެ ގޮތުން އެޗްޑީސީގެ ޗެއާޕާސަން ފިޔަވައި އެހެން ހުރިހާ ބޯޑު މެންބަރުން ސަސްޕެންޑްކޮށްފައެވެ. ފަޒުލް ވަނީ ރޭގެ ވަގުތެއްގައި އެޗްޑީސީގެ މެނޭޖިން ޑިރެކްޓަރުގެ މަގާމުން އިސްތިއުފާ ދެއްވައިފައެވެ. އޭސީސީން ވަނީ ފަޒުލްއާއި ފަޒީލު ހިމެނޭހެން 20 މީހެއްގެ ޕާސްޕޯޓު ހިފަހައްޓައިފައެވެ.

ފަޒުލް އިސްތިއުފާ ދެއްވުމާ ގުޅިގެން އެ ކުންފުނީގެ އާ މެނޭޖިން ޑިރެކްޓަކަށް ކުރީގެ ކޮންސްޓްރަކްޝަން މިނިސްޓަރު މައުރޫފް ޖަމީލް މިއަދު ވަނީ އައްޔަންކޮށްފަ އެވެ.