ސުނާމީ ކާރިސާގައި ނިޔާވި މީހުންގެ ހަނދާނުގައި ސުކޫތެއް ބާއްވައިފި

މިއަދު ސުނާމީ ކާރިސާއަށް 20 އަހަރު ފުރުމާ ގުޅިގެން މި ކާރިސާގެ ހަނދާން އާކުރުމުގެ ގޮތުން ޚާއްސަ ސުކޫތެއް ގެނެސްފި އެވެ.

މި ސުކޫތު ގެނައީ ސުނާމީގެ ރާޅު 2004 ވަނަ އަހަރު ރާއްޖެއަށް އެރި ކަމަށް ރިކޯޑްކުރެވިފައިވާ ވަގުތުގަ އެވެ. އެއީ، ހެނދުނު 9:23ގަ އެވެ.

ހުރަވީ ބިލްޑިން ހުރި ސަރަހައްދުގައި ކުރިއަށް ގެންދިޔަ ހަމަހިމޭންކަމުގެ މި ސުކޫތުކޮޅުގައި ރައީސް ޑރ. މުހައްމަދު މުއިއްޒު އިތުރުން ވަޒީރުންނާއި ރައީސް އޮފީހުގެ މުވައްޒަފުން ބައިވެރިވެވަޑައިގެންނެވި އެވެ. މީގެ އިތުރުން މާލޭ ސަރަހައްދުގެ އޮފީސްތަކުގެ މުވައްޒަފުން ވެސް ބޭރަށް ނުކުމެ މި ސުކޫތުކޮޅުގައި ވަނީ ބައިވެރިވެފަ އެވެ.

ސުނާމީ ކާރިސާގައި ރާއްޖޭގައި މީހުން ދިރިއުޅޭ ނުވަ ރަށެއް ފިޔަވައި އެހެން ހުރިހާ ރަށަކަށް ރާޅުގެ އަސަރު ކޮށްފައިވެ އެވެ. އަދި 82 ދިވެހިން ނިޔާވެ، 26 ދިވެހިން ވީނުވީއެއް ނޭނގި ގެއްލި، 15000 މީހުންގެ ގެދޮރު ވަނީ ގެއްލިފައިވެ އެވެ.