ރަސްމާލެ ހިއްކުން ލަސްވީ ވާރުތަވި އިގުތިސާދާ ހެދި، ދުވެލި ތިންގުނަ އަވަސް ކުރާނަން: ރައީސް

ބޯހިޔާވަހިކަމުގެ މައްސަލައަށް ހައްލު ގެނައުމަށް ފުށިދިއްގަރުފަޅު ހިއްކައިގެން މި ސަރުކާރުން ކުރިއަށް ގެންދާ ރަސްމާލެ މަޝްރޫއު ހިއްކުމުގެ ދުވެލި ތިންގުނަ އަވަސް ކުރައްވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ކ. ގުޅިއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، ރަސްމާލެ މަޝްރޫއުއަކީ ރާއްޖޭގެ ގެދޮރުވެރިކަމުގެ މައްސަލައަށް އެއް ސަރަހައްދަކުން އެންމެ ބޮޑު ހައްލު އަންނާނެ އަދި އެއް ފަސްގަނޑަކުން އެންމެ ގިނަ މީހުން އާބާދުވާނެ އެންމެ ބޮޑު މަޝްރޫއު ކަމަށެވެ.

ނަމަވެސް މި ސަރުކާރަށް ވާރުތަވި އިގުތިސާދުގައި ހައްލުކުރަންޖެހޭ ބައިވަރު ކަންތައްތައް ހުރުމުން ކުރިމަތިވި ދަތިތަކާ ހެދި އެ މަނިކުފާނު ބޭނުންފުޅުވި ދުވެލީގައި އެ މަޝްރޫއުގެ މަސައްކަތް މިދިޔަ އަހަރު ކުރިއަށް ނުދިޔަ ކަމަށް ވިދާޅުވި އެވެ.

”މިހާރު އަމަލީ ގޮތުން ބިން ހިއްކުން އެ ހިނގަނީ. އިތުރު ބައެއް ފަރާތްތަކުން އިތުރު ބައެއް ކޮމްޕެނީތަކުން އެތަނަށް ޑްރެޖަރު މޮބިލައިޒް ކުރުވައިގެން އެއްފަހަރާ އެތައް މަޝްރޫއުތަކެއް، އެތައް ފަރާތްތަކެއްގެ މަސައްކަތްތަކެއް އެތަ ފެށުމަށް މަސައްކަތް މި ކުރަނީ. އެހެންވީމަ ސްޕީޑް ދެގުނަ، ތިންގުނައަށް ބާރުވާނެ،“ ރައީސް ވިދާޅުވި އެވެ.

ރަސްމާލޭގެ މަޝްރޫއު ރައީސް މުއިއްޒު ފައްޓަވައިދެއްވީ 18 ޑިސެމްބަރު 2023ގަ އެވެ. އެ މަޝްރޫއުގެ ދަށުން 1،153 ހެކްޓަރުގެ ބިން ހިއްކަން ނިންމާފައިވާއިރު، އެ މަޝްރޫއު ފުރަތަމަ ހަވާލުކުރީ ސްރީ ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީ) އާއެވެ. އެއީ ދައުލަތުގެ ބަޖެޓުން އެއްވެސް ހަރަދެއް ނުކުރާ ގޮތަށް ބިން ހިއްކުމުގެ މުގާބިލުގައި ރަސްމާލެ އިންނާއި ހުޅުމާލެއިން ބިން ދޭ ގޮތަށެވެ.

ނަމަވެސް ކޮންޓްރެކްޓަރަށް ބިންތަކެއް ނުދީ އެ މަޝްރޫއު ކުރިއަށް ގެންދަން ބޭނުންވާތީ އެ ކުންފުނީގެ އެއްބަސްވުން ސަރުކާރުން ވަނީ ފަހުން އުވާލައިފަ އެވެ. އެ ފަހުން އެ މަޝްރޫއުގެ މަސައްކަތް ހުއްޓިފައި އޮންނަތާ އެތައް ދުވަހެއް ފަހުން އެ މަސައްކަތް އިންޑިއާގެ މޯހަން މުތާ އެކްސްޕޯޓު (އެމްއެމްއީ) އާއި ޗައިނާގެ ޗައިނާ ރެއިލްވޭ ކޮންސްޓްރަކްޝަން ކޮމްޕެނީ (ސީއާރުސީސީ) އާ ހަވާލުކުރި އެވެ.

ނަމަވެސް އެކަމުގެ އެއްވެސް ތަފުސީލެއް ނުދީ، މިދިޔަ ނޮވެމްބަރު މަހުގެ 10 ވަނަ ދުވަހު ސަރުކާރުން ވަނީ ރަސްމާލެ ހިއްކުމުގެ މަޝްރޫއު އަލުން ފެށިކަން އިއުލާންކޮށްފަ އެވެ. އެ ދުވަހުން ފެށިގެން މިހާތަނަށް އެ މަޝްރޫއުގެ އެއްވެސް ތަފުސީލެއް ސަރުކާރަކުންވެސް އެޗްޑީސީއަކުންވެސް ހާމައެއް ނުކުރެ އެވެ.