ޑިސެމްބަރ 16, 2025

ޕީސީބީގެ ރައީސް ކުއްލި ގޮތަކަށް މަގާމުން ވަކިކޮށްފި

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ ރައީސް ހަމްދީ އަގީލް ރޭ މަގާމުން ވަކިކުރައްވައިފި އެވެ.

އެނގިފައިވާ ގޮތުގައި ހަމްދީ މަގާމުން ވަކިކުރެއްވީ ރޭގަ އެވެ. ނަމަވެސް އޭނާ މަގާމުން ވަކިކުރެއްވި ސަބަބެއް އަދި ނޭނގެ އެވެ.

ޕީސީބީގެ ރައީސަކަށް ހަމްދީ އައްޔަން ކުރައްވާފައި ވަނީ ނޮވެމްބަރު 22، 2023 ގަ އެވެ.

ޕީސީބީގެ ރައީސްކަމުން ހަމްދީ ވަކިކުރި އިރު، ސަރުކާރު ކުންފުނިތަކުގެ މުވައްޒަފުންނަށް ރޯދަ އިނާޔަތް ފިޔަވައި އިތުރު ހަދިޔާތައް ނުދިނުމަށާއި ކުންފުނިތަކުގެ ހަރަދު ކުޑަކުރުމަށް އަންގައި ޕީސީބީން މިއަދު ވަނީ ސާކިއުލާތަކެއް ނެރެފަ އެވެ.

ޕީސީބީއަކީ ދައުލަތުގެ ވިޔަފާރި ތަންތަން ޕްރައިވެޓައިޒް ކުރުމާއި ކޯޕަރަޓައިޒް ކުރުމާއި މޮނިޓަކޮށް، އިވެލުއޭޓްކުރުމުގެ ގާނޫނުގެ ދަށުން އުފައްދާފައިވާ ބޯޑެކެވެ.