ކުޑަހުވަދޫގެ އުސްގަނޑު މަގުގައި ކާބް ސްޓޯން ޖެހުން ކުރިއަށް، މަސައްކަތުގައި އަންހެނުން

ދ. ކުޑަހުވަދޫ މަގު ހެދުމުގެ މަޝްރޫއުގެ ދަށުން އުސްގަނޑު މަގުގައި ކާބް ސްޓޯން ޖެހުމުގެ މަސައްކަތް ކުރިއަށްދާ ކަމަށް އެ މަޝްރޫއުގެ ކޮންޓްރެކްޓަރު ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އިން ބުނެފި އެވެ.

ކުޑަހުވަދޫ މަގު ހެދުމުގެ މަޝްރޫއު އާރުޑީސީއާ ހަވާލުކުރީ ކުރީ ސަރުކާރުގައި 20 ސެޕްޓެމްބަރު 2021ގަ އެވެ. ޑިޒައިން އެންޑް ބިލްޑް އުސޫލުން 123 މިލިއަން ރުފިޔާއަށް ހަވާލުކުރި އެ މަޝްރޫގެ ދަށުން 5.8 ކިލޯމީޓަރުގެ މަގުގެ ތާރު އަޅައި، މަގުގެ ފެން ހިންދާ ނިޒާމެއް ގާއިމުކޮށް މަގު ބައްތި ޖެހުން ހިމެނެ އެވެ.

މި މަޝްރޫއުގެ މަސައްކަތް ކުރީ ސަރުކާރުގައި ވަކި ހިސާބަކުން ހުއްޓިފައި އޮތް ނަމަވެސް، އާރުޑީސީގެ މިހާރުގެ މެނޭޖްމަންޓުން ވަނީ އެ މަޝްރޫއުގެ މަސައްކަތް އަލުން ފަށައިފަ އެވެ.

މަޝްރޫއުގެ ފަހުގެ މައުލޫމާތު ދެމުން އާރުޑީސީން މިއަދު ބުނީ، ދޮށިމޭނާ މަގުގައި ސްޓޯމް ވޯޓާ ހޮޅި އެޅުމުގެ މަސައްކަތްވެސް ކުރަމުން އަންނަ ކަމަށެވެ

އާރުޑީސީގެ މިހާރުގެ މެނޭޖްމަންޓުން ވަނީ ކުޑަހުވަދޫގެ މަގު ހެދުމުގެ މަޝްރޫއު ހިމެނޭ ގޮތަށް، މަޑުޖެހިފައި އޮތް 17 ރަށެއްގެ މަގު ހެދުމުގެ މަސައްކަތް މިދިޔަ ޑިސެމްބަރު މަހުގެ ފަހުކޮޅު ފަށައިފަ އެވެ.