ސްޓެލްކޯގެ ވައުދު ފުއްދަން ހަފުތާ ބަންދުގައި ވެސް ގަސް އިންދަން ނުކުންނަނީ

ސްޓެލްކޯ އިން ހިދުމަތް ދޭ ރަށްރަށުގައި ހަފުތާ ބަންދުތަކުގައި ގަސް އިންދުމުގެ ހަރަކާތްތައް ހިންގަމުން އަންނަ ކަމަށް އެ ކުންފުނީގެ މެނޭޖިން ޑިރެކްޓަރު ހުސެއިން ފަހުމީ ވިދާޅުވެއްޖެ އެވެ.

ސްޓެލްކޯ އިން ވަނީ ސަރުކާރުގެ ”ފަސް އަހަރުން ފަސް މިލިއަން ގަސް“ ޕްރޮގްރާމްގައި ބައިވެރިވުމުގެ ގޮތުން، މިދިޔަ ޖޫން މަހުގެ ފަސްވަނަ ދުވަހު، ފަސް އަހަރުން ފަސް ލައްކަ ގަސް އިންދުމަށް އަމާޒު ކަނޑައަޅައި، ހާއްސަ ހަރަކާތެއް ފަށައިފަ އެވެ.

ފަހުމީ މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ސްޓެލްކޯގެ އަމާޒަށް ވާސިލުވުމަށްޓަކައި ގިނަ މަސައްކަތްތަކެއް ކުރަމުން އަންނަ ކަމަށެވެ.

އެގޮތުން ސްޓެލްކޯ އިން ހިދުމަތް ދޭ ރަށްރަށުގައި ހަފުތާ ބަންދުތަކުގައި ގަސް އިންދުމުގެ ހަރަކާތްތަކެއް ހިންގަމުން އަންނަ ކަމަށާއި މާތްﷲގެ އިރާދަފުޅާއެކު ރައީސްގެ ވައުދު ފުއްދެވުމަށް ސްޓެލްކޯ އިން އަމާޒުހިފާފައިވާ ގޮތައް ފަސްލައްކަ ގަސް އިންދިގެންދާނެ ކަމަށް ވިދާޅުވި އެވެ.