ހަނިމާދޫ އެއާޕޯޓް ވިއްކާލަން އުޅޭ ކަމަށް ބުނެ ޔާމީން ދެއްކީ ބުހުތާނު ދޮގެއް: ސައީދު

ހަނިމާދޫ އިންޓަނޭޝަނަލް އެއާޕޯޓް އިންޑިއާގެ ކުންފުންޏަކަށް ވިއްކާލަން އުޅޭ ކަމަށް ބުނެ ކުރީގެ ރައީސް އަބްދުﷲ ޔާމީން ދެއްކެވި ވާހަކަ، އިކޮނޮމިކް މިނިސްޓަރު މުހައްމަދު ސައީދު ދޮގުކުރައްވައިފި އެވެ.

މިިދިޔަ ބުރާސްފަތި ދުވަހުގެ ރޭ ޕީއެންއެފުން ބޭއްވި ފްރޮންޓް އޮފީސް ޖަލްސާގައި ވާހަކަފުޅު ދައްކަވަމުން ޔާމީން ވިދާޅުވީ ހަނިމާދޫ އެއާޕޯޓް ނިމުމަކާ ހިސާބަށް ގޮސްފައިވަނީ އިންޑިއާ ސަރުކާރުން ވަރަށް ބޮޑަށް އެހީވެގެން ކަމަށްވާއިރު، މި ސަރުކާރުން ވިއްކާލަން ނިންމާފައިވާ ތަންތަނުގެ ތެރޭގައި އެތަން ވެސް ހިމެނޭ ކަމަށެވެ.

”އެ ވިއްކާލަން ނިންމާފައިވާ ތަންތަނުގެ ތެރޭގައި އަޅުގަނޑަށް އެނގިފައިވާ ގޮތުގައި މިފަހަރު މި ބައްދަލުކުރި މީހުންގެ ތެރޭގައި ސިންގަޕޫރުން ބައްދަލުކުރި މީހުންގެ ތެރޭގައި އަދާނީ ގްރޫޕުގެ ޗެއާމަން އާ ބައްދަލުކުރި… ހަބަރު ލިބޭގޮތުގައި ހަނިމާދޫ އެއާޕޯޓު ވިއްކާލަން މަސައްކަތްކުރަނީ އަދާނީ ގްރޫޕަށް،“ ޔާމީން ވިދާޅުވި އެވެ.

ޔާމީންގެ އެ ވާހަކަތަކަށް ރައްދު ދެއްވައި މިނިސްޓަރު ސައީދު ”އެކްސް“ގައި ކުރެއްވި ޕޯސްޓެއްގައި ވިދާޅުވީ ”ހަނިމާދޫ އެއަޕޯޓު ބޭރުގެފަރާތަކަށް ވިއްކާލަން ނުވަތަ ކުއްޔަށް ދޭން އުޅޭކަމަށް ބުނެ ފަތަރަމުންދާ ވާހަކައާއި، މިކަމާ ބެހޭގޮތުން ސިންގަޕޫރުގައި ބަޔަކާ ބައްދަލުކުރިކަމަށް ބުނެ ފަތުރަމުންދާ ވާހަކަތަކަކީ ބުހުތާނުދޮގެއް.“ ކަމަށެވެ.