ކުދިންނަށް ބުލީކުރުމަށް ހިންގާ ޕޭޖުތަކެއް ފުލުހުން ބްލޮކްކޮށްފި

ކުދިންނަށް ބުލީކުރުމަށް ހާއްސަކޮށްގެން، ސްކޫލު ކުދިން ހިންގާ ކޮންފެޝަން ޕޭޖުތަކެއް ފުލުހުން ބްލޮކްކޮށްފިއެވެ.

ފުލުހުން މީޑީއާތަކަށް މިއަދު ފޮނުވި މެސެޖެއްގައި ބުނީ ސްކޫލްތަކުގެ ދަރިވަރުންގެ މެދުގައި، ސޯޝަލް މީޑިއާ ޕްލެޓްފޯމްތައް ބޭނުންކޮށްގެން ސައިބާ ބުލީގެ އަމަލުތައް އިތުރުވަމުންދާތީ، އެކަން ހުއްޓުވުމަށް ފުލުހުންގެ ސައިބާ ކްރައިމް ސެންޓަރުގެ ފަރާތުން ހާއްސަ ފިޔަވަޅުތަކެއް އަޅަން ފަށާފައިވާ ކަމަށެވެ.

އެގޮތުން ފާއިތުވެދިޔަ ހަފުތާގައި މާލޭގެ ދެ ސްކޫލަކަށް ނިސްބަތްވާ އިންސްޓަގްރާމް ކޮންފެޝަން ޕޭޖުތަކެއް ފުލުހުންގެ ބެލުމުގެ ދަށަށް ގެނެސް، މައްސަލަ ތަހުގީގު ކުރަން ފަށާފައިވާ އިރު، އެފަދަ އިތުރު 20 ކޮންފެޝަން ޕޭޖެއްގެ މައްސަލަ ފެމިލީ އެންޑް ޗައިލްޑް ޕްރޮޓެކްޝަން (އެފްސީޕީ) އާއި ސައިބާ ކްރައިމް ސެންޓަރު ގުޅިގެން ބަލަމުންދާ ކަމަށް ފުލުހުން ބުންޏެވެ.

އެ މައްސަލައަކީ ދުވަހުން ދުވަހަށް ބޮޑުވަމުން އަންނަ މައްސަލައެއްކަން ފާހަގަކުރަމުން ފުލުހުން ބުނީ ސްކޫލް ދަރިވަރުންގެ ތެރެއިން ގިނަ ދަރިވަރުންތަކެއް އެކަމުގެ ޝިކާރައަކަށް ވެފައިވާ އިރު، އެފަދަ ޕޭޖުތައް އުފައްދައި ހިންގަމުންދާ ފަރާތްތަކަކީ ވެސް ގިނަ ފަހަރު ސްކޫލް ދަރިވަރުން ކަމަށެވެ.

ޕޭޖުތައް އުފައްދައި ހިންގާ ދަރިވަރުންގެ މައުލޫމާތު ސިއްރުކޮށް، އެހެން ދަރިވަރުންނާއި ޓީޗަރުންނާ ބެހޭގޮތުން ދޮގު މައުލޫމާތު ފެތުރުމާއި، މަލާމާތް ކުރުމާއި، ފުރައްސާރަ ކުރުމުގެ އިތުރުން ނަފްސާނީ ގޮތުން އަނިޔާ ލިބޭ ފަދަ އެތައް ލިޔުންތަކެއް އެފަދަ ޕޭޖުތަކުގައި ޕޯސްޓުކުރަމުންދާ ކަމަށް ފުލުހުން ބުންޏެވެ.