ފުލުހުންގެ ބަންދުގައި ހުރި މީހަކު މަރުވެއްޖެ، މޭޖާ ކްރައިމުން ތަހުގީގު ކުރަނީ

ފުލުހުންގެ ބަންދުގައި ހުރި މީހަކު މަރުވެއްޖެ އެވެ.

ފުލުހުން ބުނީ، އަތޮޅުވެހީގެ ހަތް ނަންބަރު ގޮޅީގައި ބަންދުގައި ހުރި ގ. ޒާމިއާ/ އަހުމަދު އަފްރާހް (48އ)ގެ ހާލަތު މިއަދު ފަތިހު 5:50 އެހާކަންހާއިރު ބެލިއިރު ހަރަކާތް ހުއްޓިފައިވާކަން ފާހަގަކުރެވުމާއި ގުޅިގެން އައިޖީއެމްއެޗަށް ގެންގޮސްފައިވާ ކަމަށެވެ.

އަފްރާހު ހޮސްޕިޓަލަށް ގެންދިޔައިރުވެސް މަރުވެފައިވާ ކަމަށް ހޮސްޕިޓަލުން މައުލޫމާތު ދީފައިވާ ކަމަށްވެސް ފުލުހުން ބުންޏެވެ.

މައުލޫމާތު ލިބިފައިވާ ގޮތުގައި އަފްރާހު ފުލުހުންގެ ހައްޔަރަށް ގެންދިޔައީ 15 އޮގަސްޓް 2025ގައެވެ. އޭނާ ބަންދަށް ގެންދިޔަ ސަބަބެއް އަދި ނޭނގެ އެވެ.

ފުލުހުން ބުނީ، އެ މައްސަލަ ފުލުހުންގެ މޭޖާ ކްރައިމް އިންވެސްޓިގޭޝަނުން ތަހުގީގު ކުރަމުން އަންނަ ކަމަށެވެ. އަދި މި ހާދިސާގެ މައުލޫމާތު ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) އަދި ނޭޝަނަލް އިންޓަގްރިޓީ ކޮމިޝަން (އެންއައިސީ) އަސް ހުށަހަޅާފައިވާ ކަމަށްވެސް ބުންޏެވެ.