ގެދޮރުވެރިޔާ ފްލެޓު އެއްބަސްވުމުގައި 1،826 މީހުން ސޮއިކޮށްފި

މާލޭގެ ރައްޔިތުންނަށް ހާއްސަކޮށްގެން ސަރުކާރުން ހިންގި ”ގެދޮރުވެރިޔާ“ ސްކީމްގެ ދަށުން ބިނާކުރި 4،000 ފްލެޓު ލިބުނު މީހުންގެ ތެރެއިން 1،826 މީހުންނާއެކު ފްލެޓު އެއްބަސްވުމުގައި ސޮއިކޮށްފައިވާ ކަމަށް ފަހި ދިރިއުޅުން ކޯޕަރޭޝަން (އެފްޑީސީ) އިން ހާމަކޮށްފިއެވެ.

މި މަސައްކަތް ކުރިއަށްދަނީ މިދިޔަ މަހުގެ 21 ވަނަ ދުވަހުން ފެށިގެން ހުޅުމާލޭ ސިންތެޓިކް ޓްރެކް ސަރަހައްދުގައެވެ.

އެފްޑީސީއިން މިއަދު އާންމުކުރި ތަފާސްހިސާބުތައް ދައްކާ ގޮތުގައި، މިހާތަނަށް ޖުމްލަ 2،774 ފްލެޓު އެއްބަސްވުމެއްގައި ސޮއިކުރަން ތާވަލުކުރެވިފައިވެއެވެ. އޭގެ ތެރެއިން 1،826 އެއްބަސްވުމެއްގައި މިހާރު ވަނީ ސޮއިކުރެވިފައެވެ. މިއީ ސޮއިކުރަން ތާވަލުކުރި އެއްބަސްވުންތަކުގެ 65.8 ޕަސެންޓު ކަމަށް ވާއިރު، ގެދޮރުވެރިޔާ ސްކީމްގެ ދަށުން ބިނާކުރެވޭ 4،000 ފްލެޓުގެ ތެރެއިން 45.7 ޕަސެންޓެވެ.

ފްލެޓު އެއްބަސްވުންތަކުގައި ސޮއިކުރުމުގެ މަސައްކަތް ފެށުނީ މިދިޔަ މަހުގެ 21 ވަނަ ދުވަހުގައެވެ. މި މަސައްކަތް ކުރިއަށް ދަނީ، ސޮއިކުރުމަށް ހަމަޖެހިފައިވާ ދުވަސްތަކުގެ ހެނދުނު 9:00އިން ފެށިގެން ހަވީރު 4:00 އާ ދެމެދު، ހުޅުމާލޭ ސިންތެޓިކް ޓްރެކްގެ ކަނޑައެޅިފައިވާ ސަރަހައްދުތަކެއްގައެވެ.

ފްލެޓު ލިބޭ ފަރާތްތަކުގެ މައުލޫމާތު ހައުސިން މިނިސްޓްރީން އެފްޑީސީއަށް ދިނުމުން، އެ މައުލޫމާތު ދިން ކަމުގެ މެސެޖެއް ފްލެޓު ލިބުނު މީހުންގެ ގެދޮރުވެރިންގެ ޕޯޓަލްއަށް ފޮނުވައެވެ. މިއީ އެއްބަސްވުމުގައި ސޮއިކުރުމުގެ ކުރިން ކުރިއަށްދާ މުހިންމު ފިޔަވަޅެކެވެ.

އެފްޑީސީއިން އިތުރަށް ބުނެފައިވަނީ، އެއްބަސްވުންތަކުގައި ސޮއިކުރުމުގެ މަސައްކަތް ކުރިއަށްގެންދާނީ ފްލެޓުތަކުގެ މަސައްކަތް ނިމި ހަވާލުކުރުމަށް ތައްޔާރުކޮށްފައިވާ ޓަވަރުތަކަށް އިސްކަންދީގެން ކަމަށެވެ. އަދި ފްލެޓުތައް ހަވާލުކުރެވޭނީ ފިނިޝިން މަސައްކަތްތައް ފުރިހަމައަށް ނިންމާފައި ކަމަށެވެ. އެގޮތުން، ފަންކާއާއި ކުޑަދޮރާއި ދޮރާއި ޓައިލްސް ހަރުކުރުން ފަދަ މަސައްކަތްތައް ނިމުމުން ކަމަށް އެ ކޯޕަރޭޝަނުން ވަނީ ހާމަކޮށްފައެވެ.