ވަޒީފާ ހޯދުމަށް ވަގު ސެޓްފިކެޓު ހުށަހަޅާ މައްސަލަތައް ފުލުހުން ބަލަނީ

ވަޒީފާއާއި މަތީ ތައުލީމު ހޯދުމަށް ސައްހަ ނޫން ތައުލީމީ ސެޓްފިކެޓުތައް ހުށަހެޅުމުގެ ގިނަ މައްސަލަތަކެއް ބަލަމުންދާ ކަމަށް ފުލުހުން ބުނެފިއެވެ.

ފުލހުން މިއަދު ނެރުނު ބަޔާނެއްގައި ބުނީ، މިފަދަ ފޭކު ސެޓްފިކެޓުތައް ހުށަހެޅުމާއި ބޭނުންކުރުމުގެ ގިނަ މައްސަލަތަކެއް ބަލަމުން ދަނީ، ދިވެހި ފުލުހުންނާއި މޯލްޑިވްސް ކޮލިފިކޭޝަން އޮތޯރިޓީ (އެމް.ކިޔޫ.އޭ) އާއި ކަމާބެހޭ އެހެން މުއައްސަސާތައް ގުޅިގެން ކަމަށެވެ.

މިއީ ގައުމުގެ ތައުލީމީ ނިޒާމުގެ އިތުބާރު ގެއްލޭނެ ފަދަ ކަމެއްކަން ފާހަގަކޮށް، މިކުށަށް އަރައިގަންނަ މީހުންނަށް ނުހައްގު މަންފާތަކެއް ލިބި، އާންމު ހިދުމަތްތަކުގެ ފެންވަރާއި އިލްމީ އަދި ޕްރޮފެޝަނަލް މިންގަނޑުތަކަށް ސީދާ އަސަރުކުރާނެ ކަމަށްވެސް ފުލުހުން ބުންޏެވެ.

ފުލުހުން އިތުރަށް ބުނީ، ސެޓްފިކެޓު ފޯޖުކުރުމުގެ ގިނަ މައްސަލަތަކެއް ފުލުހުންގެ ފްރޯޑް އެންޑް ފައިނޭންޝަލް އިންވެސްޓިގޭޝަންސް ޑިޕާޓްމަންޓުން ތަހުގީގުކޮށްފައިވާ ކަމަށާއި، މިފަދަ ބައެއް މައްސަލަތައް ދައުވާކުރުމަށްޓަކައި ޕްރޮސެކިއުޓާ ޖެނެރަލްގެ އޮފީހަށް ވެސް ފޮނުވާފައިވާ ކަމަށެވެ.

ސައްހަ ނޫން ސެޓްފިކެޓު ހުށަހެޅުން ނުވަތަ ބޭނުންކުރުމަކީ ގާނޫނީ ގޮތުން ކުށެކެވެ. އެގޮތުން، ލިޔުމަށް ބަދަލު ގެނައުމާއި، އެ ހަދާ ލިޔުން ނަކަލުކުރުމާއި، އަގުހުރި އެއްޗެއް ނަކަލުކޮށް އަސްލުގެ ގޮތުގައި ދެއްކުމާއި، ޝަހުސު އޮޅުވާލުމަކީ ޖިނާއީ ކުށެއް ކަމަށް ދިވެހި ގާނޫނުގައި ބަޔާންކުރެއެވެ.

މިފަދަ ކަންކަމާމެދު ވަޒީފާ ދޭ ފަރާތްތަކާއި ތައުލީމު ފޯރުކޮށްދޭ އެންމެހާ މުއައްސަސާތަކުން ސަމާލުވެ، ކޮލިފިކޭޝަން ފްރޭމްވޯކްގެ އޮނިގަނޑަށް އަމަލުކުރުމަށް ފުލުހުންގެ ބަޔާނުގައި ވަނީ ހަނދާންކޮށްދީފައެވެ.