ފުރޮޅާލި ޕިކަޕް ބާރު ސްޕީޑުގައި ދުއްވާފައިވާތީ ފިޔަވަޅު އަޅައިފިން: ފުލުހުން

މާލެ، ހުޅުލެ އަދި ހުޅުމާލެ ގުޅުވައިދޭ ހައިވޭއިން ދަތުރުުކުރަނިކޮށް މިއަދު މެންދުރުގެ ވަގުތެއްގައި ފުރޮޅާލި ޕިކަޕު ސްޕީޑް ލިމިޓަށްވުރެ ބާރަށް ދުއްވާފައިވާ ކަމަށް ފުލުހުން ބުނެ، އެކަމާ ގުޅިގެން ފިޔަވަޅު އަޅާފައިވާކަން ހާމަކޮށްފި އެވެ.

މާލެ އިން ހުޅުމާލެ އަށް ދާން އޮންނަ ހަލިމަގުގައި މިއަދު މެންދުރު ހިނގި މި އެކްސިޑެންޓްގެ ރިޕޯޓް ފުލުހުންނަށް ލިބިފައިވަނީ މެންދުރު 12:40 އެހާކަންހާއިރުއެވެ. އެކްސިޑެންޓާ ގުޅިގެން ފުލުހުން ބުނީ، ހަލިމަގުން ދަތުރުކުރި ޕިކަޕެއްގެ ފުރޮޅު ފަލައިގެން ގޮސް ހަލިމަގުގެ ޑިވައިޑާގައި ޖެހި، ޕިކަޕު ފުރޮޅާލައި އެކްސިޑެންޓްވެފައިވާ ކަމަށެވެ.
މި އެކްސިޑެންޓްގައި އެއްވެސް މީހަކަށް ސީރިއަސް އަނިޔާއެއް ވެފައި ނުވާ ކަމަށް ފުލުހުން ވިދާޅުވިއެވެ. ނަމަވެސް، ޕިކަޕަށް ބޮޑެތި ގެއްލުންތަކެއް ވެފައިވެއެވެ. މީގެ އިތުރުން، އެކްސިޑެންޓްގައި ޕިކަޕު ކާރެއްގައި ޖެހުނު ނަމަވެސް އެ ކާރަށް ބޮޑު ގެއްލުމެއް ލިބިފައިނުވާ ކަމަށެވެ.

ފުލުހުން ބުނި ގޮތުގައި، ޕިކަޕު ސްޕީޑް ލިމިޓަށްވުރެ ބާރަށް ދުއްވާފައިވާކަން ތަހުގީގަށް ހާމަވެފައިވާތީ އެކަމާ ގުޅިގެން ފިޔަވަޅު އަޅާފައިވެއެވެ. ނަމަވެސް، އަޅާފައިވަނީ ކޮން ފިޔަވަޅެއް ކަމެއް ފުލުހުން އަދި ހާމަކޮށްފައެއް ނުވެއެވެ.

ފުލުހުން މިހާރު ދަނީ މި މައްސަލަ އިތުރަށް ތަހުގީގު ކުރަމުންނެވެ. އެފަދަ ހާދިސާތަކުން ރައްކާތެރިވުމަށް ޓްރެފިކް ގަވާއިދުތަކަށް ހުރުމަތްތެރިކޮށް ހިތުމަށާއި، ޚާއްސަކޮށް ހަލިމަގުގައި ކަނޑައަޅާފައިވާ ސްޕީޑް ލިމިޓް ހިފަހައްޓައިގެން ދުއްވުމަށް ފުލުހުން އިލްތިމާސް ކުރެ އެވެ.