އަމާން އުދަރެސް ފްލެޓްތަކުގެ ތަޅުދަނޑި ހަވާލުކުރުން މި ހަފްތާގައި ފަށަނީ

ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލޭގެ ދެވަނަ ފިޔަވަހީގައި ތަރައްގީކޮށްފައިވާ ”އަމާން އުދަރެސް“ ފްލެޓްތަކުގެ ތެރެއިން ފުރަތަމަ 14 ޓަވަރުގެ ތަޅުދަނޑިތައް މި ހަފްތާގައި ހަވާލުކުރަން ފަށާނެ ކަމަށް އެ ކުންފުނިން މިއަދު ބުނެފިއެވެ

”ގެދޮރުވެރިޔާ“ ސްކީމްގެ ދަށުން ދޫކުރާ މި ފްލެޓްތަކުގެ ތަޅުދަނޑި ހަވާލުކުރުމުގެ މަސައްކަތް މާދަމާ ފެށުމަށް އެފްޑީސީން އަންނަނީ ތައްޔާރުވަމުންނެވެ.

އެފްޑީސީން ޕީއެސްއެމަށް މައުލޫމާތު ދެމުން ބުނީ ”ގެދޮރުވެރިޔާ“ ސްކީމްގެ ފްލެޓްތައް ހަވާލުކުރުމުގެ މަސައްކަތް މި ހަފްތާގައި ފެށޭނެ ކަމަށެވެ. އެގޮތުން ފުރަތަމަ ހަވާލުކުރާނީ ހުޅުމާލެ ދެވަނަ ފިޔަވަހީގައި ތަރައްގީކުރާ ”އަމާން އުދަރެސް“ މަޝްރޫއުގެ 16 ޓަވަރުގެ ތެރެއިން މިހާރު މަސައްކަތް ނިމިފައިވާ 14 ޓަވަރު ކަމަށެވެ.

މި ފްލެޓްތަކުގެ ތަޅުދަނޑި ހަވާލުކުރަން ނިންމާފައިވަނީ ޓަވަރުތަކުގެ އެއްބަސްވުމުގައި ސޮއިކުރުމަށްފަހު ސެކިއުރިޓީ ޑިޕޮސިޓް ދެއްކުމަށް ގެދޮރުވެރިކަމާ ބެހޭ ވުޒާރާއިން ނަން ފޮނުއްވާފައިވާ ފަރާތްތަކަށެވެ. ޓަވަރުތައް ނިމި، ސެކިއުރިޓީ ޑިޕޮސިޓް ފައިސާ ދައްކަމުންދާވަރަކުން، ޓަވަރުތައް ހަވާލުކުރުން ކުރިއަށްދާނެ ކަމަށް ވެސް އެފްޑީސީން ހާމަކުރެއެވެ.

ފްލެޓް ހަވާލުކުރާނީ އެއްބަސްވުމުގައި ސޮއިކޮށް، ސެކިއުރިޓީ ޑިޕޮސިޓް ދައްކާފައިވާ ފަރާތްތަކަށެވެ. މިގޮތުން، 2 ކޮޓަރީގެ އެޕާޓްމަންޓަކަށް 15,000ރ (ފަނަރަ ހާސް ރުފިޔާ)، އަދި 3 ކޮޓަރީގެ އެޕާޓްމަންޓަކަށް 25,000ރ (ފަންސަވީސް ހާސް ރުފިޔާ) ގެ ޑިޕޮސިޓެއް ދައްކަން ޖެހެއެވެ. މިހާތަނަށް 3,000 އަށް ވުރެ ގިނަ ފަރާތްތަކަށް ވަނީ އެއްބަސްވުމުގައި ސޮއިކޮށް، ޑިޕޮސިޓް ދެއްކުމަށް ހުޅުވާލާފައެވެ.