ޔޫކޭ، ކެނެޑާ އަދި އޮސްޓްރޭލިއާ އިން ފަލަސްތީނުގެ ދައުލަތް ބަލައިގެންފި

އިނގިރޭސި ވިލާތާއި ކެނެޑާ އަދި އޮސްޓްރޭލިއާ އިން ފަލަސްތީނަކީ މިނިވަން ދައުލަތެއްގެ ގޮތުގައި މިއަދު ރަސްމީކޮށް ބަލައިގަނެ އެކަން އިއުލާނުކޮށްފި އެވެ.

އެކަން އިއުލާން ކުރައްވަމުން ކެނެޑާގެ ބޮޑުވަޒީރު މާކް ކާނޭ ނެރުއްވި ބަޔާނެއްގައި ވިދާޅުވީ, ފަލަސްތީނުގެ ދައުލަތް ބަލައިގަންނަން ނިންމީ ފަލަސްތީނަށާއި އިޒްރޭލަށް ސުލްހަވެރި މާދަމާއެއް ހޯދައިދިނުމަށް ވެފައިވާ ވައުދުގެ ދަށުން ކަމަށެވެ.

އޮސްޓްރޭލިއާގެ ބޮޑުވަޒީރު އަލްބަނީސް ވެސް ވިދާޅުވީ އެ ގައުމުން ފަލަސްތީނުގެ ދައުލަތް ބަލައިގަތުމަށް ނިންމީ ދެ ދައުލަތުގެ ހައްލު ހޯދައިދޭން ކުރާ މަސައްކަތުގެ ދަށުން ކަމަށެވެ. އަދި އެކަމަށް ކުރާ މަސައްކަތުގައި ހަމާސްގެ އެއްވެސް ދައުރެއް ފަލަސްތީނުގައި އޮވެގެން ނުވާނެ ކަމަށް ވިދާޅުވެފައިވެ އެވެ.

ޔޫކޭގެ ބޮޑުވަޒީރު ކިއާ ސްޓާމާ ވިދާޅުވީ, އެ ގައުމުން ފަލަސްތީނުގެ ދައުލަތް ބަލައިގަންނަން ނިންމީ ފަލަސްތީނާއި އިޒްރޭލު ރައްޔިތުން ސުލްހަޔަށް ކުރާ އުންމީދު ދިރުވުމަށް ކަމަށެވެ.

މި ތިން ގައުމުންވެސް މިކަން އިއުލާންކޮށްފައި މިވަނީ މި މަހު އޮންނަ އދ.ގެ އާންމު މަޖިލީހުގެ ބައްދަލުވުމުގައި އިތުރު 10 ގައުމަކުން ފަލަސްތީނުގެ ދައުލަތް ބަލައިގަންނަން ނިންމާފައި ވަނިކޮށެވެ.