ކުޑަކުދިންތަކެއްގެ ފަރާތުން ނާޖާއިޒު ފައިދާ ހޯދި ކަމުގެ ތުހުމަތުގައި ބަޔަކު ހައްޔަރުކޮށްފި

އެ މައްސަލައިގައި ހައްޔަރުކޮށްފައިވަނީ މ.އެތުމާ/ އަލީ އަޝްރަފް، 35އ، ގދ. ވާދޫ/ ޕެރިސް، ލުހާން ސައީދު، 41އ، ގެ އިތުރުން މަޝްހޫރު ހޯސްޓް، ވ. ރަކީދޫ/ ސިލްވާ ވިލާ، ނާފިއު ރަޝީދު (ނާއްޕެ) 39އ، އަދި ހ. ފިނިކުރި އިބްރާހިމް ޝިނާން އަހުމަދު، 33އ އެވެ.

ފުލުހުން ބުނީ، އެ މީހުން ހައްޔަރުކޮށްފައި ވަނީ ހެންވޭރުގައި ހުންނަ ގެއެއްގެ އެޕާޓްމަންޓެއްގެ ތެރެއިން ކަމަށެވެ. އެ އެޕާޓްމަންޓުން މަސްތުވާތަކެތި ކަމަށް ތުހުމަތު ކުރެވޭ އެއްޗެއް ހުރި ޕެކެޓެއް ފެނުނު ކަމަށާއި ހައްޔަރުކުރި މީހުންގެ ކުޑަކަމުދާތަކެތީގެ ވަގުތީ ނަތީޖާ އިން މަސްތުވާތަކެއްޗަށް ޕޮޒިޓިވް ވެފައިވާ ކަމަށްވެސް ފުލުހުން ބުންޏެވެ.

ޕޮޒިޓިވްވީ ކޮން ވައްތަރެއްގެ މަސްތުވާތަކެއްޗަކަށް ކަމެއް އަދި އެޕާޓްމަންޓުން ފެނުނީ ކޮން ވައްތަރެއްގެ މަސްތުވާތަކެއްޗެއް ކަމެއް އަދި އޭގެ ބަރުދަނެއް ފުލުހުން ނުބުނެ އެވެ.

ފުލުހުން ބުނީ، މި މައްސަލައިގައި 17 އަހަރުގެ ދެ އަންހެން ކުއްޖަކާއި 16 އަހަރާއި 17 އަހަރުގެ ދެ ފިރިހެން ކުއްޖަކަށް އަނިޔާ ލިބިފައިވާ ކަމަށެވެ.

އަދި މި މައްސަލައިގައި ހައްޔަރުކުރި މީހުންނާމެދު ގޮތެއް ނިންމުމަށް ކޯޓަށް ހާޒިރުކުރުމުން އެ މީހުންގެ ބަންދަށް ކޯޓުން ތިން ދުވަސް ޖަހާފައިވާ ކަމަށްވެސް ފުލުހުން ބުންޏެވެ.