ކުރީގެ ފަނޑިޔާރު ފައިސަލްގެ ކޮރަޕްޝަނާއި މަނީ ލޯންޑަރިންގެ މައްސަލަތަކެއް ބަލަނީ 

ހައިކޯޓުގެ ކުރީގެ ފަނޑިޔާރު މުހައްމަދު ފައިސަލްގެ މައްސަލަތަކެއް ބަލަން އެންޓި ކޮރަޕްޝަން ކޮމިޝަން (އޭސީސީ) އިން ފަށައިފިއެވެ.

އެނގިފައިވާ ގޮތުގައި ދާދި ފަހުން ހައިކޯޓުގެ ފަނޑިޔާރުކަމުގެ މަގާމުން އިސްތިއުފާދެއްވި ފައިސަލްގެ މައްސަލަތަކެއް ވަނީ އޭސީސީއަށް ހުށަހަޅައިފައެވެ.

އެ މައްސަލައާ ގުޅޭގޮތުން އޭސީސީން ބުނީ ފަނޑިޔާރަކާ ގުޅޭގޮތުން ހުށަހަޅާފައިވާ ކޮރަޕްޝަނާއި މަނީ ލޯންޑަރިންގެ މައްސަލަތަކެއް ރަޖިސްޓާކޮށްފައިވާ ކަމަށާއި ބަލަންޖެހޭ ކަންކަން ބަލަމުންދާ ކަމަށެވެ. ނަމަވެސް އެއީ ކޮން ފަނޑިޔާރެއްގެ މައްސަލަތަަކެއް ކަމެއް އޭސީސީން ނުބުނެއެވެ.

ފައިސަލް ހައިކޯޓުގެ ފަނޑިޔާރުކަމުގެ ހުވާކުރެއްވީ، 2018 ވަނަ އަހަރުގެ ޖުލައި މަހުގެ 24 ވަނަ ދުވަހުއެވެ. މިދިޔަ މާޗް މަހުގެ 19 ވަނަ ދުވަހުން ފެށިގެން މިމަހުގެ 19 ވަނަ ދުވަހުގެ ނިޔަލަށް ހައިކޯޓު ހިންގެވުމާ ހަވާލުވެ ހުންނެވީ ފައިސަލްއެވެ.

ފަނޑިޔާރުކަމުގެ އިތުރުން ފައިސަލް ވަނީ ޖުޑީޝަލް ސާވިސް ކޮމިޝަން (ޖޭއެސްސީ)ގެ މެންބަރުކަމާއި، އެ ކޮމިޝަންގެ ނާއިބު ރައީސްކަމުގެ މަގާމު ވެސް އަދާކުރައްވައިފައެވެ. އޭގެ ކުރިން ފައިސަލް މަސައްކަތްކުރެއްވީ ގާނޫނީ ވަކީލެއްގެ ގޮތުގައެވެ.

ފައިސަލްއަކީ ކުއްލިޔަތުއް ދިރާސާތިލް އިސްލާމިއްޔާއިން ޝަރީއަތާއި ގާނޫނުގެ ރޮނގުން މަތީ ތައުލީމު ހާސިލުކުރައްވައިގެން ހުންނެވި ބޭފުޅެކެވެ.