އަތޮޅު ކައުންސިލުތައް އުވާލަން މަޖިލީހުން ފާސްކޮށްފި

އަތޮޅު ކައުންސިލުތައް އުވާލަން ރައްޔިތުންގެ މަޖިލީހުން ފާސްކޮށްފިއެވެ.

އަތޮޅު ކައުންސިލުތައް އުވާލުމަށް ގާނޫނުއަސާސީއަށް އިސްލާހު ގެންނަން ސަރުކާރުގެ ފަރާތުން މަޖިލީހަށް ބިލު ހުށަހަޅުއްވާފައިވަނީ ބާރަށު ދާއިރާގެ ޕީއެންސީ މެންބަރު އިބްރާހިމް ޝުޖާއުއެވެ.

މަޖިލީހުން ބިލު ފާސްކުރީ، މިއަދުގެ ޖަލްސާގައި ބައިވެރިވެވަޑައިގެންނެވި 87 މެންބަރުންގެ ތެރެއިން 75 މެންބަރުން ވޯޓު ދެއްވައިގެންނެވެ. ބިލު ފާސްކުރަން ނުފެންނަ ކަމަށް ވޯޓުދެއްވީ އިދިކޮޅު އެމްޑީޕީގެ 12 މެންބަރުންނެވެ.

ޝުޖާއުގެ ބިލުގައި ގާނޫނުއަސާސީއަށް ގެންނަ އިސްލާހުގައި ވަނީ، ދެން އޮންނަ ކައުންސިލް އިންތިހާބުން ފެށިގެން އަތޮޅު ކައުންސިލުތައް އިންތިހާބުކުރަން ނުޖެހޭގޮތަށް ހެދުމަށެވެ.

ގާނޫނުއަސާސީގެ 231 ވަނަ މާއްދާގެ (ހ)ގެ ތިންވަނަ ނަންބަރުގައިވާ މިހާރު އޮންނަނީ، އިދާރީ ދާއިރާތައް ހިންގުމަށްޓަކައި އުފައްދާ ކައުންސިލުތަކުގައި އަތޮޅު ކައުންސިލް ވެސް ހިމެނޭ ކަމަށާއި އަތޮޅު ކައުންސިލުގެ ރައީސްއާއެކު އެ ކައުންސިލުގައި ދެން ހިމެނެނީ އެ އަތޮޅެއްގެ ރަށު ކައުންސިލުތަކުގެ ރައީސުން ކަމަށެވެ. ޝުޖާއު އިސްލާހު ހުށަހެޅުއްވީ އެ ނަންބަރު އުނިކުރުމަށެވެ.

ރައީސް ޑރ. މުހައްމަދު މުއިއްޒު މީގެ ކުރިން ވަނީ، އަތޮޅު ކައުންސިލުގެ ބޭނުމެއް ނެތް ކަމަށް ވިދާޅުވެ، އަތޮޅު ކައުންސިލުތައް އުވާލެއްވުމަށް ގާނޫނުއަސާސީއަށް އިސްލާހު ގެންނަވާނެކަން އިއުލާންކުރައްވައިފައެވެ. އޭގެ އިތުރުން ކައުންސިލުތަކުގެ ސައިޒު ކުޑަކުރުމަށް ގާނޫނަށް އިސްލާހު ހުށަހަޅުއްވާނެ ކަމަށް ވެސް އެ މަނިކުފާނު ވަނީ ވިދާޅުވެފައެވެ.