ހިތަދޫގައި އުޅޭ ”އެސްކޭޕީ“ ގުރޫޕަކީ ގޭންގެއް ކަމަށް ކަނޑައަޅަން ހައިކޯޓަށް

ޕީޖީ އޮފީހުން މިއަދު ނެރުނު ބަޔާނެއްގައި ބުނެފައިވަނީ، ”ސްކޫޕު“، ”ސްކޫޕު ކަންމަތި“ ނުވަތަ ”SKP“ ގެ ނަމުގައި ހަރަކާތްތެރިވާ މި ގްރޫޕަކީ ގާނޫނުގައި ބަޔާންކޮށްފައިވާ ޝަރުތުތައް ފުރިހަމަވާ އަދި މިހާރުވެސް ކުށްކުރުމުގައި ހަރަކާތްތެރިވާ ގްރޫޕެއްކަން ފުލުހުން ހުށަހެޅި ހެކިތަކުން އެނގޭ ކަމަށެވެ. މި ހުށަހެޅުމުގައި އެ ގްރޫޕަށް ނިސްބަތްވާ ކަމަށް ފާހަގަވެފައިވާ ނުވަ މީހަކީ އެ ގްރޫޕްގެ މެންބަރުން ކަމަށް ކަނޑައަޅުއްވައިދެއްވުމަށް ވެސް ވަނީ އެދިފަ އެވެ.

އެއީ ކޮން ބައެއް ކަމެއް ފުލުހުންވެސް ޕީޖީ އޮފީހަކުންވެސް ހާމައެއް ނުކުރެ އެވެ.

މި މައްސަލައާ ގުޅިގެން ޕީޖީ އޮފީހުން ވަނީ އިތުރު ދެ އަމުރަކަށްވެސް ކޯޓުގައި އެދިފަ އެވެ. އެއީ އެ ގްރޫޕަށް ނިސްބަތްވާ ކަމަށް ބެލެވޭ ”އެސްކޭޕީ ސްޕޯޓްސް ކްލަބް“ އުވާލުމަށް ކޮމިޝަނަރު އޮފް ސްޕޯޓްސްގެ މައްޗަށް އަމުރުކޮށްދެއްވުމަށާއި އައްޑޫ ސިޓީގެ އެކި ތަންތަނުގައި އެ ގްރޫޕްގެ ނަން ލިޔެފައިވާ ފާރުތަކުން އެ ނަންތައް ފޮހެލުމަށް އައްޑޫ ސިޓީ ކައުންސިލްގެ މައްޗަށް އަމުރުކޮށްދެއްވުމަށެވެ.

ފުލުހުން ވަނީ މީގެ ކުރިންވެސް މިފަދަ މައްސަލައެއް ޕީޖީ އޮފީހަށް ހުށަހަޅައިފަ އެވެ.

އެ މައްސަލައާ ގުޅިގެން ޕީޖީ އޮފީހުން ބުނީ، އެ ފަހަރު ތަހުގީގު ފުރިހަމަވެފައި ނުވާތީ އެ ހުށަހެޅުން އަނބުރާ ފޮނުވާލައިފައިވާ ކަމަށެވެ. އެހެންކަމުން، މިއީ ގޭންގު ކުށްތައް ހުއްޓުވުމުގެ ގާނޫނުގެ ދަށުން ކޯޓަށް ހުށަހެޅުނު ފުރަތަމަ މައްސަލަ ކަމަށް އެ އޮފީހުން ބުންޏެވެ.

ގާނޫނުގައި ”އިންތިޒާމުވެފައިވާ ކުށްކުރާ ގްރޫޕް“ މާނަކޮށްފައިވަނީ ތިން މީހުން ނުވަތަ އެއަށްވުރެ ގިނަ މީހުން ގުޅިގެން، ޖިނާއީ ބޮޑެތި ކުށްތައް ކޮށްގެން މާލީ ނުވަތަ މާއްދީ މަންފާ ހޯދުމަށް މަސައްކަތްކުރާ ގްރޫޕްތަކަށެވެ. މިކަމާ ގުޅިގެން ކޯޓުން ގޮތެއް ކަނޑައެޅުމުން، އެ ގްރޫޕާއި މެންބަރުންނާ މެދު އަޅަންޖެހޭ އިތުރު ފިޔަވަޅުތައް ފުލުހުންނާ ގުޅިގެން އަޅަމުންދާނެ ކަމަށް ޕީޖީ އޮފީހުން ބުނެފައިވެ އެވެ.