ސައިކަލެއް ވަގަށް ނެގި މީހަކު އެއް އަހަރަށް ޖަލަށް!

މާލޭގެ ޕާކިން ޒޯނަކުން ސައިކަލެއް ވަގަށް ނެގި މީހަކު އެއް އަހަރު ދުވަހަށް ޖަލަށްލާން ކްރިމިނަލް ކޯޓުން އިއްޔެ ހުކުމްކޮށްފި އެވެ.

މި މައްސަލަ ސާބިތުވެ ޖަލަށްލާން ހުކުމްކުރީ ށ. ފޯކައިދޫ/ ޗަނބޭލީގެ, ހަސަން ރަޝީދު އަހުމަދެވެ.

އޭނާގެ މައްޗަށް ވައްކަމުގެ ކުށް ސާބިތުވީ, 22 ސެޕްޓެންބަރު 2025 ގައި ބުރުޒުމަގު/ ޝަހީދު އަލީ ހިނގުން ގުޅުނު ކަންމަތީގައި އޮންނަ ޕާކިން ޒޯނުގައި ޕާކުކޮށްފައި ހުއްޓައި ގެއްލިފައިވަނިކޮށް, ޖެހިގެން އައި ދުވަހު ގެއްލުނު ސައިކަލު އޭނާ ދުއްވަނިކޮށް ފުލުހުންނަށް ފެނިފައިވާތީ އާއި އެ ސައިކަލު ވަގަށް ނެގި ކަމަށް އޭނާ އިއުތިރާފުވުމުންނެވެ.

މައްސަލައިގައި އަދަބާ ގުޅޭ ގޮތުން ވާހަކަދައްކަމުން ހަސަން ރަޝީދު ބުނީ, އޭނާއަށް ޖޫރިމަނާ އަދަބެއް ކަނޑައަޅައި ދިނުމަށް އެދޭ ކަމަށާއި ޖޫރިމަނާގެ ފައިސާ އޭނާގެ އާއިލާ މީހުން ދައްކާނެ ކަމަށެވެ. އަދި އޭނާއަކީ ވަޒީފާއެއްގައި އުޅޭ މީހެއް ކަމަށާއި އޭނާގެ މުސާރަ ޖަމާވަނީ އޭނާގެ އަނބިމީހާގެ އެކައުންޓަށް ކަމަށްވެސް އޭނާ ބުންޏެވެ.

ނަމަވެސް އޭނާ ކޯޓަށް ހުށަހެޅި ބޭންކް ސްޓޭޓްމަންޓްތަކުން އޭނާއަކީ ވަޒީފާ އަދާކުރާ މީހެއްކަން އެނގެން ނެތް ކަމަށާއި ވަޒީފާ އަދާކުރާ ކަމަށް ބުނެ ކޯޓުގައި ދެއްކީ ތެދުނޫން ހަގީގަތާ ހިލާފު ވާހަކަތަކެއް ކަމަށް ވެސް ކޯޓުން ބުނެފައިވެ އެވެ.

ހަސަން ރަޝީދު ކުރި ކުށަކީ ޖިނާއަތުގެ ހަތަރުވަނަ ދަރަޖައިގެ ކުށެއް ކަމަށްވާއިރު، އެ ކުށަށް ކަނޑައެޅިފައިވާ އަދަބަކީ އެއް އަހަރާއި ހަތް މަހާއި ހަ ދުވަހުގެ ޖަލު އަދަބެކެވެ. ނަމަވެސް އޭނާ ކުށަށް އިއުތިރާފުވުމުން އަދަބުގެ ދަރަޖަ އެއް ދަރަޖަ ވަނީ ދަށްކޮށްފަ އެވެ.

މިގޮތުން އޭނާ ކުށަށް އިއުތިރާފުވެފައިވާތީ އޭނާގެ މައްޗަށް އިއްވާފައިވަނީ އެއް މަހާއި 12 ދުވަހުގެ ޖަލު ހުކުމެކެވެ. އޭގެތެރެއިން ހަ ދުވަހަކީ އޭނާ ބަންދުގައި ހޭދަކޮށްފައިވާ މުއްދަތަށްވާތީ، އެ މުއްދަތު ކެނޑުމަށްފަހު ޖުމްލަ ޖަލުގައި ހޭދަކުރަންޖެހޭނީ އެއް އަހަރާއި ހަ ދުވަހެވެ.