”ނިޕާ“ ވައިރަސް ފެތުރޭތީ، އޭޝިއާގެ ބައެއް އެއާޕޯޓުތަކުގައި ސިއްހީގޮތުން ވަރުގަދަ ފިޔަވަޅުތަކެއް

އިންޑިއާގެ ވެސްޓް ބެންގާލް ސްޓޭޓުގައި ”ނިޕާ“ ވައިރަސް ފެތުރެމުންދާތީ، އޭޝިއާގެ ބައެއް ގައުމުތަކުގެ އެއާޕޯޓުތަކުގައި ސިއްހީގޮތުން ބަލައި ފާސްކުރުމުގެ ކަންކަން ވަރުގަދަކުރަން ފަށައިފިއެވެ.

ވެސްޓް ބެންގާލުން އެ ވައިރަސް ޖެހިފައިވާ ފަސް މީހަކު ފެނުމާ ގުޅިގެން ތައިލެންޑް، ނޭޕާލް އަދި ޓައިވާން ފަދަ ގައުމުތަކުންނާއި ސަރަހައްދުތަކުން ވަނީ ރައްކާތެރިކަމުގެ ފިޔަވަޅުތައް އިތުރުކޮށްފައެވެ.

ނިޕާ ވައިރަހަކީ ޖަނަވާރުންގެ ފަރާތުން އިންސާނުންނަށް ފެތުރޭ ބައްޔެކެވެ. މިއީ މައިގަނޑު ގޮތެއްގައި ބަލިޖެހިފައިވާ އޫރާއި ވާލުގެ ފަރާތުން ފެތުރޭ ބައްޔެއް ނަމަވެސް، ބަލި ޖެހިފައިވާ މީހަކާ ގާތްކޮށް އުޅުމުގެ ތެރެއިން ވެސް އެ ބަލި އެކަކު އަނެކަކަށް ފެތުރިދާނެއެވެ.

ވެސްޓް ބެންގާލުގެ ހޮސްޕިޓަލަކުން އެ ވައިރަސް ފެނުމާ ގުޅިގެން، ގާތްގަނޑަކަށް 100 އެއްހާ މީހުން ވަނީ ކަރަންޓީނުކޮށްފައެވެ. އެންމެ ފުރަތަމަ އެ ބަލި ޖެހިފައިވާ ދެ ނަރުހުން ފެނުނު އިރު، އޭގެ ފަހުން ޑޮކްޓަރަކާއި ނަރުހެއްގެ އިތުރުން ހޮސްޕިޓަލުގެ އެހެން މުވައްޒަފަކު ވެސް ވަނީ އެ ބައްޔަށް ޕޮޒިޓިވްވެފައެވެ.

ތައިލެންޑުގެ ޕަބްލިކް ހެލްތު މިނިސްޓްރީން ވަނީ ވެސްޓް ބެންގާލުން އެތެރެވާ ފަސިންޖަރުން ބަލައި ފާސްކުރުމުގެ މަސައްކަތް ބޮޑެތި އެއާޕޯޓުތަކުގައި ވަރުގަދަކޮށްފައެވެ. އެކަމުގައި ބޭނުންކުރަމުންދަނީ ކޮވިޑް-19 ގެ ބަލިމަޑުކަމުގެ ތެރޭގައި ތައާރަފުކުރި އުސޫލުތައް ކަމަށް ރިޕޯޓުތައް ބުނެއެވެ.

ސުވަރުނަބޫމީ، ދޮން މުއެންގް އަދި ފުކެޓް އެއާޕޯޓުން ދަތުރުކުރާ މީހުންގެ ހުން ހުރިތޯ އާއި ބަލީގެ އެހެނިހެން އަލާމާތްތައް ހުރިތޯ ދަނީ ބަލަމުންނެވެ. އަދި ބަލިވެއްޖެ ނަމަ އަމަލުކުރަންވީ ގޮތުގެ އިރުޝާދު ދިނުމަށް ”ހެލްތު ބެވެއާ“ ކާޑު ދަތުރުވެރިންނަށް ދަނީ ދޫކުރަމުންނެވެ.

ފުކެޓް އިންޓަނޭޝަނަލް އެއާޕޯޓުގައި ވެސް ސާފުތާހިރުކަމާއި ބަލި ކޮންޓްރޯލް ކުރުމުގެ ތައްޔާރީތައް ވަނީ އިތުރުކޮށްފައެވެ. އެއީ އިންޑިއާގެ އިންޑިގޯ އެއާލައިނުން ވެސްޓް ބެންގާލާއި ފުކެޓާ ދެމެދު ކޮންމެ ދުވަހަކު ސީދާ ފްލައިޓުތައް ބާއްވާތީއެވެ.

ތައިލެންޑުގެ ބޮޑުވަޒީރު އަނޫޓިން ޗާންވީރާކުލް ވިދާޅުވީ، މިހާތަނަށް އެ ގައުމުން އެ ބަލީގެ ކޭހެއް ފެނިފައެއް ނުވާ ކަމަށާއި ނަމަވެސް ބަލިމަޑުކަމަށް ފާރަވެރިވުމުގެ ފިޔަވަޅުތައް މަތީ ދަރަޖައެއްގައި ދަމަހައްޓާނެ ކަމަށެވެ.

ތައިލެންޑް ސަރުކާރުން ބުނެފައިވާ ގޮތުގައި، އިއްޔެ އިން ފެށިގެން ވެސްޓް ބެންގާލުން އެތެރެވާ ދަތުރުވެރިން ބަލައި ފާސްކުރަން ވަނީ ފަށައިފައެވެ. ގަދައަށް ހުން އައިސްފައިވާ ނުވަތަ ބަލީގެ އަލާމާތްތައް ހުރި މީހުން ކަރަންޓީނު ފެސިލިޓީތަކަށް ބަދަލުކުރެވޭނެ ކަމަށް އެ ގައުމުގެ ރިޕޯޓުތައް ބުނެއެވެ.

އޭގެ އިތުރުން، ހޮހަޅަތަކާއި ގުދުރަތީ ރީތި ސަރަހައްދުތަކަށް ޒިޔާރަތްކުރާ ފަރާތްތަކުން ވެސް ސަމާލުވުމަށް ވަނީ އަންގައިފައެވެ. އަދި ޖަނަވާރުން ޝިކާރު ނުކުރުމަށާއި، ގަސްގަހާގެހިން ކާނާ ހޯދައިގެން ނުކެއުމަށް ފަތުރުވެރިންނަށް ވަނީ އިރުޝާދު ދީފައެވެ.

ނޭޕާލް ސަރުކާރުން ވެސް ވަނީ އެލާޓް ލެވެލް މަތިކޮށް، ކަތުމަންޑޫގެ އެއާޕޯޓާއި އިންޑިއާއާ ގުޅޭ ބޯޑަރުތަކުގައި ސިއްހީ ޗެކަޕްތައް ވަރުގަދަކޮށްފައެވެ. ބޯޑަރުތަކުގައި ހެލްތު ޑެސްކުތައް ގާއިމުކޮށް، ޝައްކުކުރެވޭ ކޭސްތައް ރިޕޯޓްކުރުމަށް ހޮސްޕިޓަލްތަކަށް ވަނީ އަންގައިފައެވެ. ނޭޕާލުގެ ސިއްހީ ވުޒާރާއިން ބުނީ ބަލި ފެތުރުން ހުއްޓުވުމަށް ބޭނުންވާ ފިޔަވަޅުތައް އަޅާފައިވާ ކަމަށެވެ.

ޓައިވާނުގެ ސިއްހީ އިދާރާތަކުން ނިންމާފައިވަނީ ނިޕާ ވައިރަހަކީ އެންމެ ނުރައްކާތެރި ބަލިތަކުގެ ލިސްޓުގައި ހިމެނޭ ބައްޔެއްގެ ގޮތުގައި ކަނޑައެޅުމަށެވެ. އޭގެ މާނައަކީ ބަލީގެ ކޭހެއް ފެނިއްޖެ ނަމަ ވަގުތުން ރިޕޯޓްކޮށް، ހާއްސަ ފިޔަވަޅުތަކެއް އަޅަން ޖެހުމެވެ.

ދުނިޔޭގެ ސިއްހަތު ޖަމްއިއްޔާ، ޑަބްލިޔުއެޗްއޯ އިން ބުނާ ގޮތުގައި، ނިޕާ ވައިރަހަކީ ބަލިމަޑުކަމެއް ފެތުރިދާނެ ފަދަ ނުރައްކާތެރި ވައިރަހެކެވެ. އެ ބަލީގެ އަލާމާތްތަކުގެ ތެރޭގައި ހުން އައުން، ބޮލުގައި ރިހުން، މަސްތަކުގައި ރިހުން، ހޮޑުލެވުން އަދި ކަރުގައި ރިހުން ހިމެނެއެވެ. އޭގެ އިތުރުން ބޯ އެނބުރުމާއި، ނޭވާލާން އުނދަގޫވުން އަދި ސިކުނޑި ދުޅަވުން (encephalitis) ފަދަ ނުރައްކާތެރި ހާލަތްތައް ވެސް މެދުވެރިވެއެވެ.

ރިޕޯޓުތައް ބުނާގޮތުގައި، އެ ބަލީގައި މަރުވާ މީހުންގެ ނިސްބަތް 40 އިންސައްތަ އާއި 75 އިންސައްތައާ ދެމެދުގައި އުޅެއެވެ. މިހާތަނަށް ބަންގުލަދޭޝް، އިންޑިއާ، މެލޭޝިއާ، ފިލިޕީންސް އަދި ސިންގަޕޫރުން އެ ބަލި ފެނިފައިވާ އިރު، އެންމެ ގިނަ މީހުން މަރުވެފައިވަނީ ބަންގުލަދޭޝްއިންނެވެ. އޭގެ ތެރޭގައި 341 ކޭހަކުން 241 މީހުން މަރުވެފައިވާ ކަމަށް ރެކޯޑުތަކުން ދައްކައެވެ.