އެނބުރި ގައުމަށް އައުމާއެކު ގައުމީ ފުޓްސަލް ޓީމަށް ހޫނު މަރުހަބާއެއް 

ސާފް ފުޓްސަލް ޗެމްޕިއަންޝިޕްގެ ތަށި ހޯދި ރާއްޖޭގެ ގައުމީ ފުޓްސަލް ޓީމު އެނބުރި ގައުމަށް އައުމުން ހޫނު މަރުހަބާއެއް ކިޔައިފިއެވެ.

ތައިލެންޑްގެ ވެރިރަށް ބެންކޮކްގައި ކުރިއަށްދިޔަ ސާފް ފުޓްސަލް ޗެމްޕިއަންޝިޕް ރާއްޖެއިން ކާމިޔާބުކުރީ ކުޅުނު ހުރިހާ މެޗެއް ކާމިޔާބުކޮށްގެންނެވެ. އެއް މެޗު ބާކީ އޮއްވައި ރާއްޖެއިން ވަނީ މުބާރާތުގެ ޗެމްޕިއަންކަން ކަށަވަރުކޮށްފައެވެ.

ވެލާނާ އިންޓަނޭޝަނަލް އެއާޕޯޓު (ވީއައިއޭ) އިން މިރޭ ޓީމަށް މަރުހަބާ ދެންނެވުމަށް ކުޅިވަރާ ބެހޭ ވަޒީރު އަބްދުﷲ ރާފިއު އާއި އެފްއޭއެމްގެ ރައީސް އަހުމަދު ތޯރިގު (ޓޮމް) ބައިވެރިވެވަޑައިގެންނެވިއެވެ. އޭގެ އިތުރުން ފުޓުބޯޅައިގެ ބައެއް ލެޖެންޑުން ވެސް ޓީމަށް މަރުހަބާ ކިޔުމަށް ބައިވެރިވިއެވެ.

ވީއައިއޭގައި ޓީމަށް މަރުހަބާ ކިޔުމަށްފަހު ކުޅުންތެރިން މާލެ އައިސް އަމީނީ މަގާއި މަޖީދީމަގުން ތައްޓާއެކު ޕިކަޕުގައި ވަނީ ދަތުރުކޮށްފައެވެ. ޕިކަޕު ބުރު ނިންމުމަށް ހަމަޖެހިފައިވަނީ އާޓިފިޝަލް ބީޗަށެވެ.

އާޓިފިޝަލް ބީޗުން ޓީމުގެ ކުޅުންތެރިންނާއި އޮފިޝަލުންނަށް ރަތް ދޫލައިގެ މަރުހަބާއެއް ކިޔާފައިވާ އިރު، އެ ސަރަހައްދަށް ގިނަ އަދަދެއްގެ މީހުން ވަނީ އެއްވެފައެވެ. ޓީމު އާޓިފިޝަލް ބީޗަށް އައުމާއެކު ވަނީ ހަވާ އަރުވައިފައެވެ.

އާޓިފިޝަލް ބީޗުގައި ބޮޑުބެރުގެ ހަރަކާތްތަކާއެކު ގައުމީ ޓީމުގެ ކުޅުންތެރިންނާއެކު ފޮޓޯ ނެގުމާއި ޓްރޮފީ އާއެކު ފޮޓޯޯ ނެގުމުގެ ފުރުސަތުވެސް އާންމުންނަށް ވަނީ ދީފައެވެ.

ރާއްޖެއިން ފުރަތަމަ ފަހަރަށް ފުޓްސަލް އިން ހޯދި ބައިނަލްއަގުވާމީ ކާމިޔާބާ ގުޅިގެން، އެ ޓީމުގެ ކުޅުންތެރިންނަށް އެއް މިލިއަން ރުފިޔާ ދޭން ރައީސް ޑރ. މުހައްމަދު މުއިއްޒު ވަނީ ނިންމަވައިފައެވެ.