ޓެކްސީ ސެންޓަރު ރަޖިސްޓަރީކުރަން ލުއިތަކެއްދީ، އިސްލާހުތަކެއް ގެނެސްފި 

ޓެކްސީ ސެންޓަރުތައް ރަޖިސްޓަރީކުރަން ލުއިތަކެއްދީ، ޓެކްސީ ކުރުމުގެ ގަވާއިދަށް ސަރުކާރުން އަނެއްކާވެސް އިސްލާހުތަކެއް ގެނެސްފިއެވެ.

ޓެކްސީ ކުރުމުގެ ގަވާއިދަށް އިސްލާހުތަކެއް ގެނެސް ޓްރާންސްޕޯޓް މިނިސްޓްރީން މިއަދު ނެރުނު ބަޔާނެއްގައި ބުނީ އެ އިސްލާހުތަކާއެކު ޑްރައިވަރުންނަށް ލިބޭ އާމްދަނީ އިތުރުކުރުމަށް މަގުފަހިވާނެ ކަމަށެވެ. އަދި ހިދުމަތަށް އެންމެ ބާރުބޮޑުވާ ވަގުތުތަކުގައި ޑިމާންޑާ އެއްވަރަށް ހިދުމަތް ފޯރުކޮށްދިނުމަށް ސެންޓަރުތަކަށް އިތުރު ފަސޭހައަކަށް ވެގެންދާނެ ކަމަށް މިނިސްޓްރީން ބުންޏެވެ.

ޓެކްސީ ގަވާއިދަށް ގެނައި މައިގަނޑު ބަދަލުތަކުގެ ތެރޭގައި ޓެކްސީ ސެންޓަރެއް ރަޖިސްޓްރީ ކުރުމަށްޓަކައި ބޭނުންވާ އުޅަނދާއި ޑްރައިވަރުންގެ އެންމެ މަދު އަދަދު 100 އިން 50 އަށް މަދުކުރުން ހިމެނެއެވެ.

އޭގެ ސަބަބުން އާ ސެންޓަރުތައް އުފެދުމަށް ހުރި ހުރަސްތައް ނެތިގޮސް، ގިނަ ބަޔަކަށް މި ދާއިރާއަށް ވަނުމުގެ ފުރުސަތު ހުޅުވިގެންދާނެ ކަމަށާއި އަދި އޭގެ ނަތީޖާއެއްގެ ގޮތުން މާކެޓުގައި ވާދަވެރިކަން އުފެދި، އާންމުންނަށް ލިބޭ ހިދުމަތުގެ ފެންވަރު ރަނގަޅުވާނެ ކަމަށް މިނިސްޓްރީން ބުންޏެވެ.

ޑްރައިވަރުންނަށް ލިބޭ އާމްދަނީ އިތުރުކުރުމަށް މަގުފަހިކުރުމުގެ ގޮތުން، ލައިސަންސް އޮންނަ ޓެކްސީ ޑްރައިވަރުންނަށް އެއް ވަގުތެއްގައި ދެ ޓެކްސީ ސެންޓަރެއްގައި ރަޖިސްޓްރީވެގެން މަސައްކަތް ކުރުމުގެ ފުރުސަތު ވަނީ ފަހިކޮށްދީފައެވެ.

ދަތުރުވެރިންގެ ރައްކާތެރިކަން ކަށަވަރުކުރުމަށްޓަކައި، މޮބައިލް އެޕްލިކޭޝަން ނުވަތަ އޮންލައިން ޕޯޓަލްތައް މެދުވެރިކޮށް ޓެކްސީ ހިދުމަތް ދޭން ބޭނުންވާ ފަރާތްތަކުން މިނިސްޓްރީގެ ހާއްސަ ހުއްދައެއް ހޯދަންޖެހޭނެއެވެ. އެގޮތަށް ހުއްދަ ހޯދައިގެން ޑިޖިޓަލް ހިދުމަތް ދިނުމަކީ ހިދުމަތްދޭ ފަރާތްތައް ޖަވާބުދާރީކުރުވުމަށް ލިބޭ ބާރެއް ކަމަށް މިނިސްޓްރީން ދެކެއެވެ.

މިނިސްޓްރީން ބުނީ ކުންފުންޏަކުން ދަތުރުފަތުރުގެ ހިދުމަތް ދޭނަމަ، އެކަމަކީ އެ ފަރާތެއްގެ މެންޑޭޓުގައި ހިމެނޭ ކަމެއްކަން ކަށަވަރުކުރަންޖެހޭނެ ކަމަށާއި އަދި އެފަދަ ފަރާތްތަކުންވެސް ގަވާއިދާ އެއްގޮތަށް ރަޖިސްޓްރީކޮށް ހުއްދަ ހޯދުން ލާޒިމުވާނެ ކަމަށެވެ.

އެ ހުރިހާ ބަދަލުތަކެއްގެ މައިގަނޑު އަމާޒަކީ ފަސިންޖަރުންނާއި ހިދުމަތްދޭ ފަރާތްތަކަށްވެސް މަންފާކުރާނެގޮތެއް ހަދައި، އިތުބާރު ހުރި އަދި ޒަމާނީ ޓެކްސީގެ ނިޒާމެއް ރާއްޖޭގައި ގާއިމުކުރުން ކަމަށް މިނިސްޓްރީން ބުންޏެވެ.

ޓެކްސީ ކުރުމުގެ ގަވާއިދަށް ސަރުކާރުން ބަދަލުތަކެއް ގެނެސްފައިވާ އިރު، ސަރުކާރުން ދަނީ އަންނަ މަހުގެ ތެރޭގައި ޓެކްސީލައިން ހިދުމަތް ފެށުމަށް މަސައްކަތްކުރަމުންނެވެ. އެކަމާ ގުޅިގެން ޓެކްސީ ޑްރައިވަރުން ދަނީ ގިނަ ކަންބޮޑުވުންތަކެއް ފާޅުކުރަމުންނެވެ.