ސިފައިންގެ ޑްރޯންތައް ބޭނުންކުރަން ފެށުމުން ވަގަށް ވަންނަ އުޅަނދު މަދުވެއްޖެ: ގައްސާން

ރާއްޖޭގެ ހާއްސަ އިގުތިސާދީ ސަރަހައްދު ވައިގެ މަގުން ބެލެހެއްޓުމަށް އުފެއްދި ސިފައިންގެ އެއާކޯގެ ހިދުމަތާއެކު ގަވާއިދާ ހިލާފަށް ރާއްޖެ ވަންނަ އުޅަނދުތައް މަދުވެފައިވާ ކަމަށް ޑިފެންސް މިނިސްޓަރު މުހައްމަދު ގައްސާން މައުމޫން ވިދާޅުވެއްޖެ އެވެ.

ރައީސް ޑރ. މުހައްމަދު މުއިއްޒު، މޯލްޑިވްސް ނޭޝަނަލް ޑިފެންސް ފޯސްގެ އެއާކޯ އުފެއްދެވީ 15 މާރިޗު 2024 ގައި ނެރުއްވި ގަރާރަކުންނެވެ. އެއާކޯ އުފެއްދެވީ 10 ޖޫން 2024 ގައެވެ. އަދި ފުރަތަމަ އެއާ ސްޓޭޝަން ”ގަން އެއާ ސްޓޭޝަން“ އިފުތިތާހުކުރީ 5 ނޮވެންބަރު 2025ގައެވެ.

ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން ގައްސާން ވިދާޅުވީ، އެއާކޯގެ ހިދުމަތާއެކު ރާއްޖޭގެ ކަނޑުގެ ސަރަހައްދުގެ ރައްކާތެރިކަން ކަށަވަރުކުރުމަށް ވަރަށް ބޮޑު ކުރިއެރުމެއް ލިބިގެންގޮސްފައިވާ ކަމަށެވެ. އެގޮތުން ރާއްޖެއަށް ގަވާއިދާ ހިލާފަށް ވަންނަ އުޅަނދުތަކުގެ އަދަދު ވަރަށް ބޮޑަށް މަދުވެފައިވާ ކަމަށް ވިދާޅުވި އެވެ.

”ކޯސްޓްކާޑް މެދުވެރިކޮށް އިންޓަސެޕްޓް ކޮށްގެން މި ހިފާ ގާނޫނާއި ގަވައިދާ ހިލާފަށް އަޅުގަނޑުމެންގެ އިގުތިސާދީ ސަރަހައްދު ތެރޭގައި ހަރަކާތްތެރިވާ މަސް ބޯޓުތައް ހިފުމުގެ ހުރިހައި އޮޕަރޭޝަންއެއްގައިވެސް ވައިގެ ސަރވޭލަންސް ލިބިފައިވޭ. މިކަން ރާއްޖޭގައި ފައްޓައިފިކަން ދުނިޔެއަށް އިނގިގެންދިއުމުން އަޅުގަނޑުމެންނަށް ފެންނަ ޓްރެންޑަކީ ގާނޫނާއި ގަވައިދާ ހިލާފަށް އިޤްތިޞާދީ ސަރަހައްދު ތެރޭގައި ހަރަކާތްތެރިވާ މަސް ބޯޓުތައް މަދުވަމުންދާކަން.“ ގައްސާން ވިދާޅުވި އެވެ.

އޭނާ ވިދާޅުވީ، ރައީސް ޑރ. މުހައްމަދު މުއިއްޒު ހާމަކުރައްވާފައިވާ ގޮތަށް މި ވަގުތު މަސައްކަތް ކުރަމުން ދަނީ ރާއްޖޭގެ އުތުރުގައާއި ދެކުނުގައި އެއާ ސްޓޭޝަންތައް ގާއިމުކުރުމަށް ކަމަށެވެ. އެގޮތުން މި އަހަރުގެ ތެރޭގައި އުތުރުގައި ގާއިމުކުރާ އެއާ ސްޓޭޝަން، ށ. ފުނަދޫގައި ގާއިމުކުރުމުގެ މަސައްކަތް ނިމިގެންދާނެ ކަމަށް ވިދާޅުވި އެވެ.