ހިޔާ ފުލެޓުތައް ކުއްޔަށް ދިނުން ހުއްޓުވުމަށް ގާނޫނަށް އިސްލާހު ގެންނަނީ 

ހިޔާ ފުލެޓުތައް ކުއްޔަށް ދިނުން ހުއްޓުވުމަށް ގާނޫނަށް އިސްލާހު ގެނައުމުގެ މަސައްކަތްކުރަމުންދާ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު މުއްތަލިބު ވިދާޅުވީ ފަހި ފުލެޓުތަކާ ފިޔަވައި، ހުޅުމާލެއިން ދެން ދޫކޮށްފައި ހުރި ފުލެޓުތައް ކުއްޔަށް ދޭ ނަމަ، ފިޔަވަޅު އެޅުމުގައި އުނދަގޫތަކެއް އެބަ ހުރި ކަމަށާއި އެތަންތަން ކުއްޔަށް ދީފައި ހުރީ ސޭލްސް އެންޑް ޕާޗޭސް މޮޑެލްގެ ދަށުން ކަމަށެވެ.

ހިޔާ ފްލެޓުތަކުގައި ގާނޫނާ ހިލާފު ކަމެއް ނުކުރެވޭނެ ކަމަށް އެގްރީމަންޓުގައިވާ ކަމަށާއި އެހެންކަމުން ގާނޫނުގައި ކުއްޔަށް ދިނުމަކީ މަނާ ކަމެއްގެ ގޮތުގައި ކަނޑައަޅަން ގާނޫނު އިސްލާހުކުރަން ނިންމާފައިވާ ކަމަށް މުއްތަލިބު ވިދާޅުވިއެވެ.

މިނިސްޓަރު ވިދާޅުވީ ފްލެޓު ކުއްޔަށް ދިނުމަކީ ސޯޝަލް ހައުސިން ސްކީމު ހިންގާ މަގުސަދާއި އުސޫލުތަކާއި ސިޔާސަތުތަކަށް ބަލާއިރު ކުރެވޭނެ ކަމެއް ނޫން ކަމަށެވެ. އަދި ހިޔާ ފުލެޓުގައި ހިންގާ ލޭބާ ކުއާޓާތައް ހުއްޓުވުމަށް ނޯޓިސްދީ، އެފަދަ ތަންތަން ހުސްކުރަމުންދާކަން ވެސް މުއްތަލިބު ފާހަގަކުރެއްވިއެވެ.

ހިޔާ ފުލެޓުތަކުގެ ތެރެއިން ގިނަ ފުލެޓުތަކެއް ހުރީ ކުއްޔަށް ދީފައެވެ. އެގޮތުން އެ ފުލެޓުތައް ކުއްޔަށް ދޫކޮށްގެން ގާތްގަނޑަކަށް 15،000 ރުފިޔާގެ ފައިދާއެއް ހޯދާކަން ފާހަގަކުރެވެއެވެ.