އެމެރިކާއާއި އިޒްރޭލު ގުޅިގެން އީރާނަށް ދެމުންގެންދާ ހަމަލާތަކާއި އޭގެ ބަދަލުގައި އީރާނުން ފޮނުވާލި މިސައިލް ހަމަލާތަކުގެ ސަބަބުން، ދުނިޔޭގެ ހަކަތައިގެ ބާޒާރަށް ފާއިތުވި އެތައް އަހަރެއްގެ ތެރޭގައި ކުރިމަތިނުވާ ފަދަ ބޮޑު ނުތަނަވަސްކަމެއް ވަނީ ކުރިމަތިވެފަ އެވެ. ދުނިޔޭގެ އެންމެ މުހިންމު ތެޔޮ އުފައްދާ ސަރަހައްދުން ތެޔޮ އެކްސްޕޯޓް ކުރުމަށް މިކަމުގެ ސަބަބުން ވަނީ ބޮޑެތި ހުރަސްތަކެއް ކުރިމަތިވެފަ އެވެ.
މެދުއިރުމަތީގެ މި ހަމަނުޖެހުންތަކުގެ އަސަރު ހަކަތައިގެ ބާޒާރަށް ކުރާނެ މިންވަރު ބިނާވެފައިވަނީ ހަނގުރާމަ ދެމިގެންދާ މުއްދަތެއްގެ މައްޗަށެވެ. ނަމަވެސް، މިހާރުވެސް އުފެދިފައިވާ ބިރުވެރިކަމާއި ނުތަނަވަސްކަމުގެ ސަބަބުން، ދުނިޔޭގެ ތެލުގެ ސަޕްލައިގެ 20 އިންސައްތަ ހިއްސާކުރާ މި ސަރަހައްދުގެ ތެލުގެ ވިޔަފާރިއަށް ވަނީ ބޮޑެތި ލޮޅުންތަކެއް އަރަން ފަށައިފަ އެވެ.
އެހެންކަމުން މި މައްސަލައަށް އަވަސް ހައްލެއް ނުލިބިއްޖެނަމަ، އަންނަ ހަފުތާ ފަށާއިރު ތެލުގެ އަގު ވަރަށް ބޮޑަށް އުފުލިގެންދާނެ ކަމަށް ބެލެވެ އެވެ. މެދުއިރުމަތީގައި މިހާރު ކުރިއަށްދާ އަސްކަރީ ކުރިމަތިލުންތައް އިތުރަށް ފުޅާވެ ދިގުދެމިގެން ހިނގައިދާނެ ކަމަށް އިންވެސްޓަރުން ތައްޔާރުވަމުންދާއިރު، ފާއިތުވި ދެތިން ދުވަހު އެކަނިވެސް ބްރެންޓް ކްރޫޑް ތެލުގެ އަގު ވަނީ ފީފާއެއް ގާތްގަނޑަކަށް 70 ޑޮލަރަށް އުފުލިފަ އެވެ. މިއީ 2025 ވަނަ އަހަރުގެ އޮގަސްޓް މަހަށްފަހު ތެލުގެ އަގު މިހާ މައްޗަށް ދިޔަ ފުރަތަމަ ފަހަރެވެ.
އެމެރިކާއާއި އިޒްރޭލުން ހޮނިހިރު ދުވަހު އީރާނުގެ އިސްވެރިންނަށް އަމާޒުކޮށް ވަރުގަދަ އަސްކަރީ ހަމަލާތަކެއް ދީފައިވާއިރު، މިކަމުގެ ސަބަބުން މެދުއިރުމަތީގެ މަސްރަހު ވަނީ އިތުރަށް ގޯސްވެ، ފުޅާ ދާއިރާއެއްގެ ހަނގުރާމައެއްގެ ތެރެއަށް ވެއްޓިފަ އެވެ.
އެމެރިކާގެ ރައީސް ޑޮނަލްޑް ޓްރަމްޕް ވިދާޅުވި ގޮތުގައި، މި ހަމަލާތަކުގެ ސަބަބުން އެމެރިކާއަށް އޮތް ސަލާމަތީ ނުރައްކާތައް ނެތިގެންދާނެ އެވެ. އަދި މިއީ އީރާނުގެ ރައްޔިތުންނަށް އެ ގައުމުގެ ވެރިކަން ބަދަލުކުރުމަށް ލިބޭ ފުރުސަތެއް ކަމަށްވެސް އޭނާ ފާހަގަކުރެއްވި އެވެ.
ގުޅުންހުރި