ފަރުހާދުގެ މައްޗަށް ކުރެވޭ ތުހުމަތުތައް ސާބިތެއް ނުވޭ: އިހުސާން 

ފުލުހުންގެ ހިންގެވުމާ ވަގުތީގޮތުން ހަވާލު ހުންނެވި ޑެޕިއުޓީ ކޮމިޝަނަރު ފަރުހާދު ފިކުރީގެ މައްޗަށް ކުރެވޭ ތުހުމަތު ސާބިތު ނުވާ ކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ވިދާޅުވެއްޖެއެވެ.

އެކްޓިން ސީޕީގެ މަގާމު ފަރުހާދު އަދާކުރައްވަން ފެއްޓެވީ، ޕޮލިސް ކޮމިޝަނަރުގެ މަގާމުގައި މީގެ ކުރިން ހުންނެވި އިސްމާއިލް ނަވީން، މިދިޔަ މަހުގެ ތެރޭގައި ރިޓަޔާކުރެއްވުމާ ގުޅިގެންނެވެ. އޭގެ ކުރިން ހުންނެވި އަލީ ޝުޖާއު ރިޓަޔާކުރެއްވުމުން ވެސް އެކްޓިން ސީޕީގެ މަގާމު އަދާކުރެއްވީ ފަރުހާދެވެ.

މީގެ ކުރިން ޝުޖާއު އިސްތިއުފާދެއްވުމުން، ސީޕީގެ މަގާމަށް ކުރިމަތިލެއްވި ބޭފުޅުންގެ ތެރޭގައި ފަރުހާދު ވެސް ހިމެނުނެވެ. ނަމަވެސް ފަރުހާދުގެ ފިރިހެން ދަރިފުޅު މަސްތުގެ ހާލަތުގައި ހުރެ ފުލުހަކަށް ހަމަލާދިންކަމުގެ ތުހުމަތުގައި ހައްޔަރުކުރުމުން ފަރުހާދު ނުފޫޒު ބޭނުންކޮށްގެން، ދަރިފުޅު ސަލާމަތްކުރަން އުޅުއްވިކަމުގެ ތުހުމަތުތައް އެ ދުވަސްވަރު ކުރެވެމުންދިޔައެވެ. އަދި ސީޕީގެ މަގާމަށް އެ ފަހަރު އައްޔަންކުރެއްވީ ނަވީނެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު އިހުސާން ވިދާޅުވީ، ފަރުހާދުގެ މައްޗަށް އޮތް ތުހުމަތު ތިން މުއައްސަސާއަކުން ބަލާފައިވާ ކަމަށާއި ނަމަވެސް އޭނާއާ މެދު އެއްވެސް ފިޔަވަޅެއް އެޅިކަން އަންގާފައި ނުވާ ކަމަށެވެ. އަދި އެ މައްސަލައަކީ ފަރުހާދުގެ މައްޗަށް ސާބިތު ނުވާ މައްސަލައެއް ކަމަށް ކަނޑައަޅާފައިވާ ކަމަށް ވެސް މިނިސްޓަރު ވިދާޅުވިއެވެ.

ހުރިހާ މީހުންގެ މައްޗަށް ވެސް ކުރެވޭ ތުހުމަތުތައް ރަނގަޅަށް ބަލައި، އޭގައި ފިޔަވަޅު އަޅަން ޖެހޭ ކަމަށްވާ ނަމަ އެ މައްސަލަތައް ބަލައި، ފިޔަވަޅު އަޅަން ނުޖެހޭ ފަރާތަކަށްވާ ނަމަ، ބޭއިންސާފުން ނާއިންސާފުން ފިޔަވަޅެއް ނޭޅޭނެ ކަމަށް މިނިސްޓަރު ވިދާޅުވިއެވެ.

މިނިސްޓަރު އިހުސާން ވިދާޅުވީ އެކްޓިން ސީޕީކަން ފަރުހާދަށް ލިބުނީ ސީޕީގެ މަގާމު ހުސްވާ ހާލަތުގައި އެ މަގާމަށް ޑެޕިއުޓީ ސީޕީއަކަށް ހުންނަވާ ބޭފުޅަކު ވަގުތީގޮތުން އައްޔަންކުރަން ޖެހޭ ކަމަށް ގާނޫނުގައިވާތީ ކަމަށެވެ.