ޕީއެންސީން މި ނުކުތީ އައްޑޫގެ ރަސްކަމެއް ނިންމަން، މިފަހަރު ތަފާތު ފެންނާނެ: ޝިޔާމް 

ޕީއެންސީ ނުކުމެ އޮތީ އައްޑޫ ސިޓީގެ ރަސްކަމެއް ނިންމުމަށް ކަމަށާއި އެ ސިޓީން މިފަހަރު ތަފާތު ފެންނާނެ ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެއެވެ.

ޕީއެންސީގެ އައްޑޫ ސިޓީ މާލޭގެ ކެމްޕޭން އޮފީސް ހުޅުވުމަށް މިރޭ ބޭއްވި ރަސްމިއްޔާތުގައި ވާހަކަދައްކަވަމުން ޝިޔާމް ވިދާޅުވީ މިއޮތް ހުރިހާ ދުވަހު އައްޑޫ ސިޓީ މޭޔަރާއެކު ކައުންސިލުގެ މެޖޯރިޓީ ދީގެން އައްޑޫ ސިޓީއަށް އެއްވެސް ކަމެއް ކޮށްދެވިފައި ނުވާ ކަމަށެވެ.

އެމްޑީޕީގެ ސަރުކާރުގައި އައްޑޫ ސިޓީ ކައުންސިލުގެ މެޖޯރިޓީ އާއި ރައްޔިތުންގެ މަޖިލީހުގެ މެޖޯރިޓީ އެ ޕާޓީއަށް ދީގެން، އެ ސިޓީއަށް ގެނެވުނު ތަރައްގީއެއް ނެތް ކަމަށާއި މިއޮތް ހުރިހާ ދުވަހަކު އައްޑޫ ސިޓީގެ މޭޔަރު ގޮނޑި ފެނިގެންދިޔައީ އެމްޑީޕީން ކުރަމުންދިޔަ ރަސްކަމެއްގެ ގޮތުގައި ކަމަށް މިނިސްޓަރު ވިދާޅުވިއެވެ.

ޝިޔާމް ވިދާޅުވީ ޕީއެންސީ ނުކުމެ އޮތީ އެ ރަސްކަން ނިމުމަކަށް ގެނައުން ކަމަށާއި އެކަން ނިންމުމާއެކު އައްޑޫން ތަފާތު ފެނިގެންދާނެ ކަމަށެވެ. އަދި އެ ރަސްކަން ނިންމުމަށް އައްޑޫގެ ރައްޔިތުން ޕީއެންސީގެ ކެންޑިޑޭޓުން ހޮވައިދޭނެކަމުގެ ޔަގީންކަން އޮތް ކަމަށް ވެސް މިނިސްޓަރު ވިދާޅުވިއެވެ.

ރައީސް ޑރ. މުހައްމަދު މުއިއްޒު ކައުންސިލުތަކާ ބައްދަލުކުރެއްވުމުގައި ތަފާތުކުރުމެއްނެތި އެމްޑީޕީގެ މެޖޯރިޓީ އޮތް ކައުންސިލުތަކާ ވެސް ބައްދަލުކުރެއްވި ކަމަށާއި ނަމަވެސް އައްޑޫގެ މިހާރުގެ މޭޔަރު އަލީ ނިޒާރު ފާހަގަކުރެވެނީ ސަރުކާރަށް ޖެއްސުން ކުރުމުގައި އެންމެ ކުރީ ސަފުގައި ގުނައިލެވޭ މޭޔަރެއްގެ ގޮތުގައި ކަމަށް މިނިސްޓަރު ޝިޔާމް ވިދާޅުވިއެވެ.