ފްލެޓް ކުއްޔަށް ދޭނަމަ 50،000ރ އިން ޖޫރިމަނާކޮށް ފްލެޓް އަތުލާނަން: އެފްޑީސީ

ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލެ ފޭސް 2ގައި ތަރައްގީކޮށްފައިވާ ފްލެޓްތައް ކުއްޔަށް ދޭނަމަ 50،000 ރުފިޔާ އިން ޖޫރިމަނާކޮށް، ފްލެޓް އަތުލާނެ ކަމަށް އެ ކުންފުނީގެ މެނޭޖިން ޑިރެކްޓަރު ހަމްދާން ޝަކީލް ވިދާޅުވެއްޖެ އެވެ.

އެފްޑީސީގެ ފްލެޓް ލިބުނު ބައެއް މީހުން އެ ފްލެޓްތައް ކުއްޔަށް ދޫކުރަން ސޯޝަލް މީޑިއާގައި ދަނީ ޖަހަމުންނެވެ. އެފަދަ މައްސަލައެއް މިހާރުވެސް ވަނީ ފެންމަތިވެފަ އެވެ. އެގޮތުން އެފްޑީސީގެ ތިން ކޮޓަރީގެ އެޕާޓްމެންޓެއް 23،000 ރުފިޔާއަށް ކުއްޔަަށް ދިނުމަށް މީހަކު ވަނީ ސޯޝަލް މީޑިއާގައި ޖަހައިފަ އެވެ.

އެއީ ތިން ކޮޓަރީގެ ފްލެޓްތަކަށް މަހަކު ދައްކަންޖެހޭ ކިއްޔަށްވުރެ ދެގުނަ ބޮޑު އަދަދެކެވެ. އެފްޑީސީގެ ތިން ކޮޓަރީގެ ފްލެޓްތަކުގެ ކުއްޔަށް މަހަކު ދައްކަން ޖެހެނީ 11،500 ރުފިޔާ އެވެ.

އެ މައްސަލައާ ގުޅިގެން ޝަކީލް އެކްސްގައި ކުރެއްވި ޕޯސްޓެއްގައި ވިދާޅުވީ، ކުއްޔަށް ދޭން ޖަހާފައިވާ ފްލެޓުގެ މައްސަލަ އެ ކުންފުނިން ބަލަމުން އަންނަ ކަމަށެވެ. އަދި އެފްޑީސީ ފްލެޓްތަކަކީ ތިންވަނަ ފަރާތަކަށް ކުއްޔަން ދެވޭނެ ތަންތަން ނޫން ކަމަށާއި އެފަދައިން ކުއްޔަށް ދޭނަމަ 50،000 ރުފިޔާއާ ހަމައަށް ޖޫރިމަނާކޮށް ފްލެޓުގެ އެއްބަސްވުން ބާތިލު ކުރެވޭނެ ކަމަށް އޭނާ ވިދާޅުވި އެވެ.

ޝަކީލް އިތުރަށް ވިދާޅުވީ، ސަރުކާރުން އިޖުތިމާއީ ބޯހިޔާވަހިކަމަށް ދޫކޮށްފައިވާ ފްލެޓްތައް ކުއްޔަށް ދިނުމަކީ އިޖުތިމާއީ ބޯހިޔާވަހިކަމުގެ މަޝްރޫއުތަކުގެ މަގުސަދަށް ހުރަސް އެޅޭ ކަމެއް ކަމަށެވެ. އަދި އަސާސެއް ގޮތުން މިއީ ގޯސް އަމަލެއް ކަމަށާއި ފްލެޓްތައް ކުއްޔަށް ދީގެން ފައިދާ ހޯދުމުގެ ވިޔަފާރިއަކަށް ހެދުމަކީ ކޮންމެ ދިވެއްސެއްގެ ހައްގަށްވެސް އަރައިގަތުން ކަމަށް ވިދާޅުވި އެވެ.