ހަންޓާވައިރަސް ފެތުރިފައިވާ ކްރޫޒް ޝިޕުން އޮސްޓްރޭލިއާއަށް އައި ފަސިންޖަރުންގެ ކަރަންޓީނު މުއްދަތު ސިއްހީ އޮފިޝަލުން އިތުރު ތިން ހަފުތާއަށް އިތުރުކޮށްފިއެވެ.
މި މީހުން ކަރަންޓީނުގައި ތިބޭތާ މިހާރު ތިން ހަފުތާ ވެފައިވާ އިރު، އިތުރު ތިން ހަފުތާއާއެކު، އެމީހުން ޖުމްލަ ހަ ހަފުތާ (42 ދުވަސް) ކަރަންޓީނުގައި ހޭދަކުރަން ޖެހޭނެއެވެ.
އޮސްޓްރޭލިއާގެ ހެލްތު މިނިސްޓަރު މާކް ބަޓްލާ ވިދާޅުވީ، ކަރަންޓީނުގެ މުއްދަތު އިތުރުކުރަން ނިންމީ އެ ބޯޓުން ދަތުރުކުރި އެހެން ދެ މީހަކު (ނެދަލޭންޑްސްގެ ކްރޫއަކާއި ސްޕެއިންގެ ފަސިންޖަރަކު) ދާދިފަހުން ޕޮޒިޓިވްވުމާ ގުޅިގެންނެވެ.
މި ނިންމުމުގެ ސަބަބުން އަސަރުކުރީ ޕާތުގެ ކަރަންޓީނު ފެސިލިޓީއެއްގައި ތިބި ހަ މީހަކަށެވެ. އެމީހުންގެ ކަރަންޓީނު މިހާރު ވަނީ ޖޫން 23 ގެ ނިޔަލަށް އިތުރުކޮށްފައެވެ. ނަމަވެސް، މި ހަ މީހުންގެ ހާލުވެސް އަދި ރަނގަޅެވެ. އަދި ފަހުން ހެދި ޓެސްޓުތަކުން ވެސް ވަނީ ނެގެޓިވްވެފައެވެ.
ހަންޓާވައިރަސް ފެތުރެން ފެށީ އާޖެންޓީނާއިން ފުރައިގެން ދަތުރުކުރި ”އެމް.ވީ ހޮންޑިއަސް“ ނަމަކަށް ކިޔާ ކްރޫޒް ޝިޕެއްގައެވެ. މިއީ މީދަލުގެ ޒަރީއާއިން ފެތުރޭ ވައިރަހެކެވެ. މި ބޯޓާ ގުޅުންހުރި 13 ކޭސް މިހާތަނަށް ފެނިފައިވާ އިރު، ތިން ފަސިންޖަރަކު ވަނީ މަރުވެފައެވެ.
