ފީފާ ވޯލްޑް ކަޕް 2026 ގެ ”ގްރޫޕް އެލް“ގެ ފުރަތަމަ މެޗުތަކުގެ ތެރެއިން އެންމެ ފާހަގަކޮށްލެވޭ އެއް މެޗުގައި އިނގިރޭސިވިލާތާއި ކްރޮއޭޝިއާ ބައްދަލުކުރާ އިރު، މިއީ ތާރީހީ ގޮތުންނާއި ފެންވަރުގެ ގޮތުން އަދި މުހިންމުކަމުގެ ގޮތުން ވެސް ފުރިހަމަ މެޗަކަށް ވާނެއެވެ.
މި މުބާރާތުގެ ފޭވަރިޓުންގެ ތެރޭގައި ހިމެނިގެން އިނގިރޭސި ޓީމު މުބާރާތާ ކުރިމަތިލާ އިރު، އެ ޓީމުގެ ކޮންމެ މަގާމަކަށް ވެސް ހުނަރުވެރި ކުޅުންތެރިން އެބަތިއްބެވެ. ކެޕްޓަން ހެރީ ކޭން އެޓޭކްގައި އިސްކޮށް ހުރި އިރު، ޖޫޑް ބެލިންހަމް ވަނީ ދުނިޔޭގެ އެންމެ މޮޅު މިޑްފީލްޑަރުންގެ ތެރޭގައި ހިމެނިފައެވެ. އަދި ބުކާޔޯ ސަކާ، އެންތޮނީ ގޯޑަން ފަދަ ކުޅުންތެރިންނާއެކު އިނގިރޭސި ޓީމުގެ އެޓޭކިން ލައިން ވަރަށް ނުރައްކާތެރިވާނެއެވެ.
ނަމަވެސް، 1966 ވަނަ އަހަރުގެ ވޯލްޑް ކަޕަށްފަހު ބޮޑު މުބާރާތެއް ކާމިޔާބު ނުކުރެވުމުގެ ޕްރެޝަރު އެ ޓީމަށް އަބަދުވެސް އޮވެއެވެ. ކްރޮއޭޝިއާ އަތުން ހޯދާ މޮޅަކީ ސަޕޯޓަރުންގެ ހިތްވަރު އާލާކޮށްދޭނެ މުހިންމު ފިޔަވަޅަކަށް ވާނެއެވެ.
ކްރޮއޭޝިއާ އުންމީދާއެކު ކުރިމަތިލަނީ
ކްރޮއޭޝިއާ އަކީ މިހާރު މުބާރާތުގެ ފޭވަރިޓުންގެ ގޮތުގައި ނުބެލެވުނަސް، އެ ޓީމަކީ ފުޓްބޯޅައިގެ ބޮޑެތި މުބާރާތްތަކުގައި ނަތީޖާ ނެރެން ދަންނަ ބައެކެވެ. 2018 ވަނަ އަހަރުގެ ފައިނަލާއި 2022 ވަނަ އަހަރުގެ ސެމީ ފައިނަލަށް ދަތުރުކުރުމުން އެކަން ސާބިތުވެއެވެ. ޓީމުގެ ތަޖުރިބާކާރު ކުޅުންތެރިން ކެރިއަރު ނިންމަން ކައިރިވެފައިވީ ނަމަވެސް، ޓެކްނިކަލް ގޮތުން މޮޅު ކުޅުންތެރިން އުފެއްދުމުގައި އެ ޓީމު އަދިވެސް ދެމިތިބެއެވެ.
ދެ ގައުމުގެ ދެމެދުގައި އޮތް ތާރީހީ ވާދަވެރިކަން
ވޯލްޑް ކަޕް 2018 ގެ ސެމީ ފައިނަލުގައި އިތުރު ވަގުތު ކުޅެ 2-1 އިން އިނގިރޭސިވިލާތް ބަލިކުރި މެޗު އެއްވެސް އިނގިރޭސި ސަޕޯޓަރަކު ހަނދާން ނުނެތޭނެއެވެ. އެ ބައްޔަކީ އިނގިރޭސި ފުޓްބޯޅައިގެ ތާރީހުގައި އެންމެ ހިތްދަތި އެއް ހަނދާނެވެ. އެހެންކަމުން މި މެޗުގައި ބަދަލު ހިފުމުގެ ރޫހެއް އިނގިރޭސި ކުޅުންތެރިންގެ ކިބައިން ފެނުން އެކަށީގެންވެއެވެ.
މެޗުގެ މުހިންމު ހިސާބު: ބެލިންހަމް އާއި ކްރޮއޭޝިއާގެ މިޑްފީލްޑް
މެޗުގެ ނަތީޖާ ކަނޑައަޅާނީ މިޑްފީލްޑްގެ ތެރެއިންނެވެ. ޖޫޑް ބެލިންހަމްގެ ހުނަރާއި ބާރު، ކްރޮއޭޝިއާގެ މިޑްފީލްޑަރުން ހުއްޓުވަން ޖެހޭނެއެވެ. އިނގިރޭސި މިޑްފީލްޑަށް މެޗު ކޮންޓްރޯލް ކުރެވިއްޖެނަމަ، ކްރޮއޭޝިއާގެ ޑިފެންސަށް ބޮޑެތި ގޮންޖެހުންތަކާ ކުރިމަތިލާން ޖެހޭނެއެވެ.
އިނގިރޭސި ޓީމުގެ ސްކޮޑްގެ ފުންމިނާއި ހުނަރަށް ބަލާއިރު އެ ޓީމު ކުރި ހޯދުމުގެ ފުރުސަތު ބޮޑެވެ. ކްރޮއޭޝިއާގެ ތަޖުރިބާ އަކީ އެ ޓީމަށް އޮތް ބާރެކެވެ. ނަމަވެސް ފެންނަ ފެނުމަށް އިނގިރޭސި ޓީމު މި މެޗު ކާމިޔާބު ކުރުމާ ގާތެވެ.
އިނގިރޭސީންނާއި ކްރޮއޭޝިއާ ބައްދަލުކުރާ ”ގްރޫޕު އެލް“ގެ މެޗު ކުޅުމަށް ހަމަޖެހިފައިވަނީ ރާއްޖޭގަޑިން މާދަމާ ރޭ 1:00 ގައެވެ.
