މެލޭޝިއާގެ ކުރީގެ ބޮޑުވަޒީރު މަހާތީރު މުހައްމަދުގެ އަނބިކަނބަލުން ސިތީ ހަސްމާ މުހައްމަދު އަލީ އަވަހާރަވެއްޖެ އެވެ.
އެކަމަނާ އަވަހާރަވީ ކުއާލަ ލަމްޕޫރުގެ ނޭޝަނަލް ހާޓް އިންސްޓިޓިއުޓްގައި ފަރުވާ ހޯއްދަވަމުން ދަނިކޮށް މިއަދުގެ ވަގުތެއްގައެވެ. އަވަހާރަވި އިރު، އުމުރުފުޅަކީ 100 އަހަރެވެ.
މެލޭޝިއާގައި އެންމެ ދިގު މުއްދަތަކަށް ވެރިކަން ކުރެއްވި ބޮޑުވަޒީރު، މަހާތީރާއި ސިތީ ހަސްމާ ކައިވެނިބައްލަވައިގަތީ 1956 ގައެވެ. އެ ދެކަނބަލުންނަށް ހަތް ބޭފުޅުން ލިބިވަޑައިގެންފައިވެ އެވެ.
މަހާތީރުގެ އޮފީހުން ބުނި ގޮތުގައި ސިތީ ހަސްމާގެ ކަށުކަމާކެމީގެ ކަންކަން މިއަދު ހަވީރު ބޭއްވުމަށް ވަނީ ހަމަޖެހިފަ އެވެ. އެކަމަނާ ފަސްދާނުލުމަށް ހަމަޖެހިފައިވަނީ މެލޭޝިއާގެ އިދާރީ ވެރިރަށް ޕުތުރާޖާޔާގެ މުސްލިމުންގެ ގަބުރުސްތާނެއްގައެވެ. ނަމަވެސް އިތުރު ތަފްސީލެއް ހާމަކޮށްފައެއް ނުވެ އެވެ.
މެލޭޝިއާގެ ބޮޑުވަޒީރު އަންވަރު އިބްރާހީމް ވަނީ ސިތީ ހަސްމާ އަވަހާރަވުމާ ގުޅިގެން ތައުޒިޔާ ވިދާޅުވެފަ އެވެ. އަދި އެ ކަމަނާގެ ޖަނާޒާގެ ކަންކަން ކުރިއަށްދާނީ ދައުލަތުގެ ފުރިހަމަ އިއްޒަތުގައި ކަމަށް ވިދާޅުވި އެވެ.
”އެކަމަނާގެ މައިވަންތަ ސިފަތައް ގައުމު އަބަދުވެސް ހަނދާންކުރާނެ، އެކަމަނާ ކޮށްދެއްވި ހިދުމަތްތަކާއި އަގުހުރި މަސައްކަތްޕުޅުތަކުގެ އަގު ވަޒަންކުރާނެ،“ އަންވަރު ނެރުއްވި ބަޔާނެއްގައި ވިދާޅުވި އެވެ.
