އިޒްރޭލުން ހިފާފައިވާ ހުޅަނގު އައްސޭރީގައި އުޅޭ ފަލަސްތީން ރައްޔިތުންނާ ދެކޮޅަށް ހަނގުރާމަ ކުރުމަށް އެބައި މީހުންގެ ކަނާތުފިޔައިގެ ހަރުކަށި ފިނޭންސް މިނިސްޓަރު ބެޒަލެލް ސްމޮޓްރިޗް ގޮވާލައިފި އެވެ.
އިސްރާއީލުގެ ޚަބަރު ފަތުރާ ވެބްސައިޓް ”ވައިނެޓް“ ގެ ޕޮޑްކާސްޓެއްގައި ވާހަކަދައްކަމުން ސްމޮޓްރިޗް ވަނީ ދެކުނު ލުބުނާނާއި ޣައްޒާގެ ބައެއް ސަރަހައްދުތައް އިޒްރޭލުގެ ބާރުގެ ދަށަށް ގެނައުމަށްވެސް އެބައި މީހުންގެ ޔަހޫދީ ސިފައިންނަށް ގޮވާލައިފަ އެވެ.
އޭނާ ބުނީ, އެދެނީ މަދުވެގެން ޣައްޒާގެ ރީނދޫ ރޮނގާ ހަމައަށް އަދި ލުބުނާނުގެ ލިތާނީ ކޯރާ ހަމައަށްވާ ސަރަހައްދުތައް އިޒްރޭލުގެ ދަށަށް ގެންނަން ކަމަށެވެ. ސަބަބަކީ ޓެރަރިޒަމަށް ވާގިވެރިވާ ފަލަސްތީނިއަން އޮތޯރިޓީ އުވާލުމަށް ކަމަށްވެސް އޭނާ ބުންޏެވެ.
ރީނދޫ ރޮނގަކީ ފާހަގަކުރަނީ، 7 އޮކްޓޫބަރު 2023 ގައި ހަމާސް އާއި އިޒްރޭލާ ދެމެދު ފެށި ހަނގުރާމައަށްފަހު، މިހާރުވެސް އިޒްރޭލުގެ އަސްކަރިއްޔާގެ ބާރުގެ ދަށުގައިވާ ޣައްޒާގެ ސަރަހައްދެކެވެ.
ސްމޮޓްރިޗަކީ 1967 ވަނަ އަހަރުން ފެށިގެން އިޒްރޭލުން ހިފާފައިވާ ހުޅަނގު އައްސޭރި އެ މީހުންގެ ދަށަށް ގެނައުމަށް ވަކާލާތުކުރާ މީހެކެވެ.
ޣައްޒާގައި ހަނގުރާމަ ފެށުނު ފަހުން، ހުޅަނގު އައްސޭރީގައި ހަމަނުޖެހުންތައް ވަނީ ވަރަށް ބޮޑަށް އިތުރުވެފަ އެވެ. އެގޮތުން ފަލަސްތީނުގެ ރަސްމީ ހިސާބުތަކަށް ބިނާކޮށް އޭއެފްޕީން އެކުލަވާލާފައިވާ ހިސާބުތައް ދައްކާ ގޮތުން، އިޒްރޭލު ސިފައިންނާއި ވަޒަންވެރިންގެ ހަމަލާތަކުގައި ހުޅަނގު އައްސޭރިން މަދުވެގެން 1،110 ފަލަސްތީނު މީހުން ވަނީ ޝަހީދުކޮށްލައިފަ އެވެ.
އިޒްރޭލުގެ ހިސާބުތައް ދައްކާގޮތުން، ހަމަ އެ މުއްދަތުގައި ފަލަސްތީނުން ދިން ހަމަލާތަކުގައާއި އިޒްރޭލުގެ އަސްކަރީ އޮޕަރޭޝަންތަކުގެ ތެރޭގައި، އާންމުންނާއި ސަލާމަތީ ބާރުތަކުގެ މީހުން ހިމެނޭހެން މަދުވެގެން އެބައި މީހުންގެ 49 މީހުން ވަނީ މަރުވެފަ އެވެ.
ފަހަކަށް އައިސް ފަލަސްތީން މީހުންނާ ދެކޮޅަށް ޔަހޫދީ ވަޒަންވެރިން ދޭ ހަމަލާތައް ވަރަށް ބޮޑަށް އިތުރުވެފައިވާއިރު، ގިނަ ފަހަރަށް އެފަދަ ފަރާތްތަކާ ދެކޮޅަށް ގާނޫނީ އެއްވެސް ފިޔަވަޅެއް ނާޅަ އެވެ. ނުވަތަ އަޅަނީ ވަރަށް ކުޑަ ފިޔަވަޅެކެވެ.
