މަޝްހޫރު ވިޔަފާރިވެރިޔާ އަދި ރައްޔިތުންގެ މަޖިލީހުގެ ނައިބް ރައީސް އަހުމަދު ސަލީމް (ރެޑްވޭވް ސަލީމް) ސަލީމަށް މިދިޔަ އެއް އަހަރު ތެރޭ އާމްދަނީގެ ގޮތުގައި 3.5 މިލިއަން ރުފިޔާ ލިބިފައިވާ ކަމަށް އޭނާގެ މާލީ ބަޔާނުން ދައްކައިފި އެވެ.
ވިހިވަނަ މަޖިލީހުގެ މެމްބަރުންގެ ދެވަނަ އަހަރުގެ މާލީ ބަޔާން މަޖިލީހުގެ ވެބްސައިޓުގައި މިހާރު ވަނީ ޝާއިއުކޮށްފަ އެވެ. އެއީ 28 މޭ 2025 އިން 27 މޭ 2026ގެ ބަޔާނެވެ.
ސަލީމްގެ މާލީ ބަޔާނުގައި ބުނެފައިވާ ގޮތުން އެ ބަޔާން ތައްޔާރުކުރި މުއްދަތުގައި އޭނާއަށް މަޖިލީހުން ލިބޭ މުސާރައާއި ކުންފުނީގެ މުސާރައިގެ ގޮތުގައި 1.9 މިލިއަން ރުފިޔާ ލިބިފައިވެ އެވެ. އަދި ވިޔަފާރީގެ ނަފާގެ ގޮތުގައި 1.5 މިލިއަން ރުފިޔާ ލިބިފައިވާއިރު ކުލީގެ ގޮތުގައި 180,000 ރުފިޔާ ލިބިފައިވާ ކަމަށްވެސް ބުނެފައިވެ އެވެ. އެ ކުއްޔަކީ ހ. ފަށަން ގޭގައި ހުންނަ އުރީދޫގެ އެންޓަނާގެ ކުލި ކަމަށްވެސް ބުނެފައިވެ އެވެ.
މި ހުރިހާ އެއްޗެއް އެއްކޮށްލުމުން ސަލީމަށް އެއް އަހަރު ތެރޭ 3.5 މިލިއަން ރުފިޔާ ލިބުނު ނަމަވެސް އޭނާގެ ނަމުގައި ހުޅުވާފައިވާ ދެ އެކައުންޓުގައިވެސް އެއްވެސް ފައިސާއެއް ނެތް ކަމަށް ބުނެފައިވެ އެވެ.
ސަލީމްގެ މާލީ ބަޔާނުގައި ބުނެފައިވާ ގޮތުން އޭނާ ގެންގުޅެނީ ދެ އެކައުންޓެކެވެ. އެއީ މޯލްޑިވްސް އިސްލާމިކް ބޭންކާއި މޮރިޝަސް ކޮމާޝަލް ބޭންކުގައި ހުޅުވާފައިވާ ދެ ކަރަންޓް އެކައުންޓެވެ. ރާއްޖޭން ބޭރުގައިވެސް އެއްވެސް ބޭންކް އެކައުންޓެއް ހުޅުވާފައެއް ނުވެ އެވެ.
އޭގެ އިތުރުން ސަލީމްގެ ނަމުގައި ރާއްޖެއާއި ރާއްޖޭން ބޭރުގައި އެއްވެސް ލޯނެއްވެސް ނަގާފައި ނުވާ ކަމަށް މާލީ ބަޔާނުގައި އޭނާ ބުނެފައިވެ އެވެ.
